GOBABIS-ndango zegendeso moOmaheke kavahundilire Ministeli zonondima,mema ntani evhuva vagwederereko nofarama ntatu kwedi vana kara nado yipo ngano navasesupika udigu ou wokupira nnofarama. Munasipundi gondango gendeso zaOmaheke Iganatius Kariseb katulire ehundiro eli posiruwo oso kavakare nelikwamo lyokuzegurura nomberewa dawo paveta melima eli 2025, moGobabis, momandaha.
Age kahuyungire asi eyi yokukara asi vantu kwato evhu kuna kara udigu unene, mukuretesapo ekuliko yikare asi mekoro namo udigu unene una karapo. ‘’Nsene kapi ono kara nevhu, ekoro lyoge kapi tavakara neparu lyewa, lilifane nowo vana kara nevhu lyawo.
Kurundika vantu ndi kuvatura mevango limwe tupu yiyo nye yina kuninkisa vantu vamwe vakakare pevhu eli lyakara asi kapi tovhuru kuliruganesa yonondima,’’ yimo ana kutanta Karisb.
Elikwamo eli lyokugavera evhu kuna kara asi lyokuza komeho momukunda gwaOmaheke.
Mokwedi kwaKudumogona mvhura zina puko, vanafarama ava vapira nofarama awo ngava lisire tupu moGobabis pwahana asi paveta modoropa hena, mofarama ezi vana kutumbura asi Witsand, yatwarederere dogoro vavakwate.
Omu nye ana kugava asi yinke yina kara pangenderera, Kariseb katente asi twahepa kukara nelikwamo lyopangenderera tugavere evhu eli. ‘’ Ose nompitisili dopamukunda kuna hara asi nofarama ntatu vadigwederereko yirugana nye eyi nayitunda koministeli zevhu yipo vantu vetu vagwane ebvhu.
Ose nkenye ezuva novantu vetu tuna diva asi udigu wawo yinke nokukora oku vana kuzuvha,’’ yimo ana kutanta.
Munasipundi kagwedereko asi kugavera nofarama kuna kara yinalirunga runga, ngesi vanafarama ku
na kulisira nye mevhu lina kara asi lyodoropa ntani mononkondwa tupu ngoso. Age katente asi nompitisili domukunda nare dagusa kuyihuyunga eyi kumwe nava vahamenako ano ngesi kuna kuhundira nye ministeli navamwe vahamenako vaguse etokoro lyokuhulilira.
‘’Mokugavera evhu eli mokuninka asi varetesepo mukaro gomuwa kovanandima vakare nevango lyawo omu navaruganena unandima pwahana woman di utjirwe, nelituromo lyawo, yimo ngoso ana kutanta kansela gwaSWAPO moOmaheke.
Apa nye katupaparere nkumbu, ministera gonondima, mema ntani evhu Calle Schlettwein, nage kaligwasanene asi yousili vantu kuna hara evhu, nye nongendeseso edi dakarapo vahepa kudikwama.
‘’ Ose twakara nongendeseso zopaveta ezi atukwama, mokugava nofarama kovantu, ntani twakara nokomitiyee ezi zakara nosinka sangoso.
Moruha nye rwaOmaheke, nguuru gomukunda Pijoo Nganate yige nye munasipundi gokomitiyee, makuara ndango zovakansela zahepa kugwanekere nokomitiyee ozo,’’ yimo ngoso ministera ana kugava magano gendi. –Nampa