Omupresidente Nangolo Mbumba okwa kumaida eeminista opo di twikile okulonga nelitulemo, nouyuuki nosho yo okulihumbata nawa ngaashi naanaa ovaleli.
Edi Mbumba okwe di popya onghela pefimbo a ninga omutumba wotete wokomudo moWindhoek neeminista da dja keeministeli da yooloka.
Okwa popya ta ti eeminista ovanhu ve linekelwa nova pewa oshikunawanifa shokuwilika eeministeli davo tashi pitile mokuandjaneka omayakulo koshiwana.
“Eeministeli deni nadi longe noudiinini okukondjifa ondjala noluhepo, okueta po eemhito doilonga nosho yo okuyambula po eliko loshilongo,” Mbumba a popya.
Pefimbo lomutumba Mbumba okwa halela eveluko lomendelelo Omupresidente wotete noku li xe yoshiwana Sam Nujoma ou e li a tambulilwa moshipangelo shopaumwene shoLady Pohamba koWindhoek.
Nujoma okwa tambulilwa moshipangelo oshivike sha dja ko.
Mbumba okwa popya ta ti omudo wa dja ko kakwa li mupu pefimbo olo kwa li kuna omahoololo Oupresidente noilyo yomutumba wopashiwana.
“Otwa teelela okukanangeka Omupresidente omutitano noku li omukainhu wotete Netumbo Nandi-Ndaitwah momafiku 21 Maarsa neudo,” ta ti.
Okwa pandula oilyo yoSwapo oyo ya hoololwa okuya keumbo lomutumba wopashiwana.
“Onda pandula eshi mwa kwashipaleka kutya Swapo ota ka mona oipundi ihapu keumbo lopashiwana pefimbo lewiliko laNandi-Ndaitwah,” ta ti.
Mbumba okwa popya ta ti onghela olo efiku laye laxuuninwa okuninga omutumba neeminista molwaashi ita kala vali Omupresidente okudja momafiku 21 omwedi tau ya.
“Natu twikileni okulonga nelitulemo, okukala noukumwe nokukaleka po ombili moshilongo shetu,” ta ti.