Ngaashi sha ndhindhilikwa kutya Omuthiya ogu li popepi nomahala haga hili aapashiyoni naatalelipo, omwedhi nguka otaku ka dhimbulukilwa esiku lyomapashiyono muuyuni.
Omuthiya ogu li moshitopolwa shaShikoto, nesiku lyomapashiyono muuyuni otali ka dhimbulukulwa moshitopolwa moka momasiku 27 gaSepetemba nuumvo.
Omuthiya ogu li popepi nomahala ga simanekwa nohaga hili aatalelipo, ngaashi Othithiya oshowo Ehala lyiinamwenyo ya gamenwa Etosha.
Elelo lyondoolopa lyOmuthiya olya pititha omushangwa kutya esiku ndyoka otali ka dhimbulukiwa kohi yoshipalanyolo “okuxwaxwameka nokusimaneka oshowo okukaleka po omuthigulwakalo”.
“Otatu longekidha okudhimbulukwa esiku lyomatalelepo muuyuni oshoka epangelo lyaNamibia olyi li oshilyo shiigwana yahangana, onkene otatu ka tyapulila pamwe,” taya ti ngaaka momushangwa.
Elelo olya fatulula kutya elalakano natango okukwatela po omuthigululwakalo pamukalo gokusimaneka nokutalela po omahala ngoka ge na oondjokonona dhi na ongushu.
“Omapashiyono ohaga yambula po wo eliko momindhingoloko, shoka hashi lundulula onkalo oshowo okushonopaleka onkalo yoluhepo,” ya fatulula ngaaka.
Omapashiyon oga simana oshoka otaga dhana onkandangala momindhingoloko taga holoka.
Iitopolwa oyindji oya tameke okuninga omauliko giipindi ngoka haga hili natango aantu ya za kiitopolwa yi oli noyi ili oshowo kondje yiilongo.
Uuministeli womindhingoloko owa ti etompelo lyomatalelepo okuza poonkatu ndho pevi sigo o pombanda, oku etapo eliko lyoshimaliwa.
Omatalelepo ohaga eta iiyemo ya gwedhapo moshitopolwa nenge moshilongo.
“Uuna aatalelipo ya hokwa pehala ohaya longitha nokuthigapo oshimaliwa shoka tashi yambidhidha natango aayetipo oshowo mboka taya sile oshimpwiyu ehala,” ya ti ngaaka.
Oshiwike sha zciko uuministeli owa kumagidha Aanamibia ya simaneke omahala ge na oondjokonona, ngaashi iilongo iikwawo tayi ningi.
Wa popi kutya iilongo oyindji otayi hupile momahala gokutalelwa po oshowo iiyetwa po yokoonyala yomithigululwakalo dhawo.
– vkaapanda@nepc.com.na