OUTJOB – Ai!âkam ǂgiǂgosi ǂgaeǂgui-aob, United Democratic Fronts (UDF) dib, Gaob Justus ǁGaroeb ge ǂoa ge wekheb Denstaxtsēs ai gere ǂâi-oa, Zambiab !nâb ge !Huis di Presidenti, Sam Nujomab xōǀkha hâs ǀkha ūhâ i hō!âdi xa. 

Khorixas !nâ ge Nujomab !aroma ūhe hâ i tsâbaǁhaos !oabas tawa gere ǁîb ǀons !nâ khomaihe haisi-ams !nâb ge ǁGaroeba gere ǂâi-oa mâtib ge ǂguro !nās ase ǂkhamkhoesis âb !nâ Sam Nujomaba a ǀhao-ū !khaisa. 

“Tita ge ǁau ǂkham khoe ge i ta, !gao!gaob presidenta ta ge !Gomenǁgams !nâ a ǀhao-ū ǁaeb ai. ǁŌǂoa ge Nathaniel Maxulilib oms xōǀkhā ǀgui ta ge tita gere hâ tsî ge ge kaise ǂauna ǂnûde ǀguiba ge ūhâ, ǀaweǁguigu tsî ǀnîkhamikō xūna ge gere !hoa!nâde. ǁGaroeb ge ǁnāti ī ǀō-aisa khoe-i ǀkhab ge ǂangu tsî a hō!â ǂans !aroma koas ǀguisa ge ūhâ i. 

Ai!âb Gaoba gere mîs ge, ǁîb ge ǁnā ǁaeb di ge i Damara Raads ǂnûǁkhaebas ǀkha, !norasasib !khamdi ǁaeb !nâ Lusakas ǁga ge sari, ǁnāpab nî Nujomab tsî ǁîb ǀkha ge hâ in ǀkha ǀhûǁare hâse !norasasiba !khambas ǀaweǁguigu !nâ am!nâxase. 

“Tita ge ǁnāpa ti Damara Raads ǂgaeǂgui-aon ǀkha ge sī tsî da ge Lusakas !nâ ǁaupexa ǀgam wekhekha ge hâ,” tib ge ǁGaroeba ge mî. 

“ǁNāpa ta ge Nujoma si a ǀhao-ū, o ta ge ge ǂan i, ǁnâu!āba ūhâ tsî ka-ai khoeb, ǀgaisa tsî !oaǂnôa ǂgaosa ūhâb tsî ǂgaeǂgui-aob ǁhawosa ūhâb, Suid Wes Afrikabab ǁgâiǀāba xu nî !nora!noras diba.” ta ge ǀhao-ūsa.” 

ǁGaroeb noxopa gere ǂâihōs ge mâtigu ge ǁîb, Nujomab tsî Kenneth Kaundab hâga !nonase Kaundab di !gûkhoehâ!khaib tawa Zambiab !nâ ǀō-aisa ǀgaisa ǂnûde gere ūhâ !khaisa. 

ǁÎb ge ge mî, ǁōǂoa ge !hūb di ǁûb, Hage Geingob xab ge ǁgui-aisa māhe, îb Nujoma !hoaǂgomǂgom îb !khams ǁâtanina ǁgui tsî United Nations ǂkhîb ǀhûǀguide ǁhao ti. 

“Nujomab ge nēs !nâ māsen tama ge hâ i, mîb geresa !oab hânab ǁîba ǁhûidi ǁga nî !gûs kara, os nēsa PLANs go a ǂoa!nâ ti nî mûsen !khaisa,” tib ge ǁGaroeba ge mî, ǁGaroeb ge ge mî, Nujomab ge wekheb !kharaga ǁgamǁaredi dib khao!gâ a ǁnâumāsen !khaisa. 

Ai!âb ǁîba ge mîsa !oa di ge ǁnâugu!hoaǁarede ge supu tama hâ i, xawes ge ǀams ai !norasa Namibiab !aroma a hâsa. –Nampa