Chairmaine Boois
Mariental-nkarapamwe zaGochas momukunda gwaHardap kavakere nelyatero lyopampora ntani elikwamo lyediworoko moune omu nye vana kudiworoka vakadona vavali ava vadipagere modoropa zaOkahandja.
Munasipundi gondango zegendeso Gochas, Theresia Cloete, katanterere Nampa asi nongereka dakara momukunda ogu kavawizire vayapure ndango zegendeso asi awo vana kara negano lyokulyatera lyopampora ano kumwe nye nokutantera nkarapamwe nazinye zilihameseremo. ‘’ Ose, vatungimo moGochas, kuna sikama apa tulize kumwe nekoro ava kavazumbanesere vahara vawo. Ngagumwe govareti, ose kuna kuzuvha kukora ngwendi yiwo, ntani kuna kulira kumwe nawo,’’ yimo ana kutanta. Cloete katente asi eyi yahoroka kwanakufa mukadona gonomvhura ntano Ingrid Maasdorp, gonomvhura ntazimwe Roswind Fabian; ntani naBeyonce !Kharuxas gonomvhura murongo nantano eyi yavahorokera kuvhura kuhoroka kwankenye gumwe mwankenye doropa. ‘’ Eyi kapi yina kara asi udigu waOkahandja, nye kuna kara nye udigu wovatungimo navenye mosirongo setu esi,’’ yimo ana kutanta.
Malyatero gokulisiga siga kwahoroka mwaza sirongo omu vana kulira vakwawo ava vatusiga morwa kwavadipaga, omu vana kuyimona edipago lya Maasdorp ogu vakwaterere kononkondo ntani kumwe nokumudipaga, mokwedi kwaNsinanomvhura zeezi ntani Fabian na !Kharuxas, owo vadipaga nye mokwedi kwaKudumogona. Mitili arongo posure zosekendere Bradley Booysen, ogu nage kakere posilika sangesi, katente asi awo kavayirugene eyi kapisi asi nampo mokulira tupu kumwe nekoro, nye kuna kugava nawo runyegenyo rwawo nokugava nombudi edi kowo vana kuyirugana.
Elikwamo lyediworoko kuna kara mokufumadeka eparu lyovasesugona ava kavatusigire morwa ngsirongo, ose ngesi natuvenye kuna tugumu nomfa edi, nye nampili ngoso ose tuna kara nelikwamo lyokuhanesa mbudi ezi unene kovanona womoGochas kuhamena udona una karapo, unene kowo nye vana kara asi kapi vakara nomagwanekero konongodi ndi asi internet, morwa sinzi sonombudi dangesi kuna kara tupu nye ko online,yimo ana kutanta Booysen.
Elyatero ngesi kuna kuyahaga nye kumwe nelikwamo lyediworoko eli kavayakarere pevango lyaEpiphanias Lutheran Church-Nampa