WINDHOEK-Omupresidente gwoshilongo Hage Geingob okwa hokolola kutya oku li u uvite uuntsa netumba, sho aanangeshefa yopaumwene taya longo nomukumo mokutula po ekwatathano lya kola pokati kaashitipo yiilongomwa, omandiki gokuandjagakaneka osho wo oolandi, nomukalo ngoka otagu eta iitopolwa yeliko kohi yoshikogo shimwe.
Shika presidente okwe shi popi mEtiyali lyoshiwike shika omanga a li ta egulula pambelewa ehala lyomalandithilo goositola oonene moshilongo Wernhil Park oshiluku oshitine, moshilandopangelo.
Geingob okwa hokolola kutya nonando Namibia okwa mangulukila aanangeshefa yokondje yoshilongo mokuhumitha oshilongo komeho ngele tashi ya paliko nuukalinawa waantu moshilongo, onkene oshi li sha simana ngele Aanamibia taya tameke mpaka okumuna muyo yene opo ya tse omukumo aakwiilongo ye shi ninge.
“Out na okukala omutse gwoku ngeshefela meni lyoshilongo, opo tu patulule oompito dhaakuuyuni ya wape oku shi ninga. Onkene otashi hokitha nokunyanyudha ngele Aanamibia otaya ngeshefele moshilongo shawo,” osho omupresidente a hokolola ngaaka.
Okwa tsikileko tati kutya epangelo olyi shi wete kutya onkalo yeliko ombwiinayi oya dhana onkandangala sho ya gumu nayi onkalonawa yAanamibia, unene tuu aaniilonga.
Ashike okwa ti kutya limwe lyomomashongo ga taalela oshilongo taga vulu okushunitha iipindi pevi noshowo eliko lyomoshilongo, oondyoka lyokutya omeya ihaga longithwa nawa, ngaashi naanaa oshilongo sha talela oshikukuta ngashingeyi.
Omutse gwoshilongo okwa ti kutya oshilandopangelo ngashingeyi otashi nyengwa okukondolola elongitho nayi lyomeya shoka woo tashi vulu okushunitha ongundu yaanangeshefa monima.
“Omanga twa taalela omashongo woo gehumokomeho, out na okukala twa itula mo noku kala tu na etimaumbwile lyokulonga nuudhiginini, opo tu ye po nomadhilaadhilo omawanawa ngoka taga nkondopaleke ehumokomeho koonono,” osho a popi ngaaka nomuthindo.
Okwa ti onkene ehumokomeho ndika lyaWernhil otali ulike kutya nonando ope na omashongo koonoono opuna ashike ondjila yokuya kethikilo lyehumokomeho.
Onkene nonande out na omashongo ngaka itatu kala ashike twa tala omaupyakadhi ngoka onkene natu kale woo tu na edhilaadhilokandulopo lyomukundu.