OPUWOS – Ûitsamaxūn tsî !hana╪gari-aon Kunene ׀Kharib tsî Omusati ׀kharib hâkha din
ge ra mî, ׀gaisa ī║khāsib hâsa nē ׀kharikha !nâb ׀khuruba nē haka║î kuriba noxopa nî ai!gûsa. Nampas ge ╪oago wekheb !nâ !kharaga !garo!ā ׀khariga ║nā ׀kharikha !nâ ge sari hâ i, ║îna xu ׀nanub mâsib xa !nāsase ║nâusa ║gausen irasa !oab ׀nanuba kaise ׀orose nēpa ge ║nā hâ i amaga. ׀Nî !garo!ā׀kharigu ge ׀gui !nās ׀guisa ׀nanuba ge !khō!oa tsî xawes ge nēsa ׀gui ׀khara׀kharasen i tsîna hā-ū tama hâ kaiseb ge ׀khuruba ׀gaisase nēpa a tsâ׀khā xui-ao.
Nē ╪hôa╪uis ge Omusati ׀kharib !nâ Omakanges tsî Omuhama !garo!āra ge sari hâ i tsî Kunene ׀kharib !nâ Okaoko Otavis, Otjerundas tsî Orotjitombos hâde. ׀Nî !garo!ā !âgu !nâb ge ׀gâba ge mûsa i, naun tawa i nēsi ׀gui gere !ī xawe ╪nâsasiba gere mûsense.
!Hao!nāsi ׀awemā-aob, Oscar Kazondub, Omuhama !garo!ā ׀kharib dib ge ge mî, ║îb ׀kharib ge kaise ׀oro ׀nanuba a !khō!oasa. ║Nā ׀oro ׀nanub ge !Khan׀gôab di ׀ams ai ge ║nā hâ i.
“Sida ge ║khawa ׀khara ׀khurub xa !âuhe hâ, ║nā ge ׀nanub tsîn ׀guis khami i ׀khara׀kharasi-i tsîna hā-ū tama amaga. Sida ge ׀gâna ūhâ tama hâ tsî da ge ║nās xō׀khās tsîna !hana╪ûn tsîna ╪gā tama ge ī ׀nanub ge !onkhao hâse a ║nā amaga,” tib ge ge mî.
Kazondub ge ge mî, ║îb ge mâtikō ׀nōb di ׀nanuban ge !khō!oasa ׀nō tama hâ īsa, xawen -║îna !hao!nâsi ╪ūsigu !oa !gâi ׀nanub di ║nāsa ║khaegu di ׀oas ai ra ׀nōsa. Noxopa nau ׀gaub hîan ׀nanub di ║nāsa ra nōb ge !āga dâu tsî tsaudi tsî xorade ׀oasa. !Aru׀îb ge ge mî, nē ׀nanub di ׀gaub nî hā ra tsēdi !nâ !gâi׀khāb ║ga unusen tama is kara on ║-îna !kharu ge !nona kurigu di !gommi ║ga nî !oasa tsî haka║î kurib ׀khurub diba nî !oasa. ║În ge kaise ╪gui ûitsamaxūna ra ╪oa!nâ tsî ׀gâsib !nâ ׀gui ra ╪û, nēb hoarahūs di hui ║în ūhâba amaga. !Hana╪gā-aon tsîn ge ׀guis khami ī hōdawa-i tsîna nē kurib !aroma ūhâ tama hâ, nēn ge hoan hîa ׀khurub xa ra !aromahese ina, tib ge Kazonduba ge mî.
Kazondub ge ╪hanub ai ╪gansa ra dī, îb tā ׀û ║îna ׀khurub huib ╪ûna māsa !hana╪gā-aon ׀guis khami ī xū-i tsîna nē kurib !aroma ūhâ tama hâ tsîn ╪gari-aona !nāsa !gôagu di ûitsamaxūna ׀khurub xa !aromahe hâse a ╪oa!nâ xui-ao. ╪Hanub ra mā huib ge kaiseb ga a ╪khariro xawe kai harebes ase sida !aroma ī.
Kaino Mumbuus, !hana╪gā-aos, Omakange ׀kharib dis ge ge mî, !hanagu !gâi ╪ûba nēsis kōse mā tama hâsa tsîn ║nān hîa gere ╪nûi-amna ge ║ōsa ׀oro ׀nanub xa !aromahe hâse. ║Îs ge ge mî, !nona !nādi kōsen ║khawa !hanaga gere ╪gāsa ai!âkamn gere ║ō tamas ka io ╪nâ xui-ao ׀nanub ׀khais tamas ka io !onkhao hâse hā tsî xawe ╪âu tamase hās xa !aromahe hâse.
Muumbus ge nausa ׀nî !âgu Omakange !garo!ā ׀kharib !nâ ge ╪oago wekheb !nâ ║nā !gâi ׀nanuba ge ╪an!gâ tsî koasa gere mā tsî ║îs tsîn ║nā !gâi!gâ hâ !hana╪gā-aon tsî ╪gari-aon ׀kha ra !gâia╪gao׀hao !haisa gere gowa╪ui.
Ovijapa !Hao!nāsi ╪Gae╪guis di danakhoeb, Ueritjiua Katundub ge Nampasa ge mîba, -║îb di ׀kharib ge ׀nî !âgu !nâ !gâi Ιnanuba a !khō!oasa, xaweb ge !û-aib ╪namipeba kaise !kharu ge ׀khuru kurigu xa ge dīkakahe tsî ║aeba nî ūsa ║khawa ׀gâna ║hais !aroma. “!Hūb hîab ׀gâba nî ║hai-aib ge kaise a ╪gā tsî ׀gaisa ׀nanub hîa ║khāti ║aeb Ιgaiba saogubese ra hāb xa ׀gui nî xūkaihe khami ra mûsen. Kaiseb ge !û-aiba ge hîkakahe ╪gui !gôab di ׀ui׀nū tsî kai׀nū xamarin xa.
Sida ge ╪auna ׀nanuba a !khō!oa ║khā, xawe i ge ׀guis khami ī ׀gâ-i ûitsamaxūn nî !û i tsîna a ׀khai. !Khomn nî ׀asase ׀omkhâi ׀gau-i tsîn ge a ׀khai, ׀haib ׀guib ge ║goe. ║Nāpan ge ╪auna bardenna hoarahus !û-aiba ║khawa ra dīkaka tsî da !kharu ge kurigu di ׀khuruba ║khawa nî !oase. Khoeda ase kai !aob !nâ ra tsēkorope hâ kai da mâsib ge mûts ra mûdi !nân ge barden âtsa hui-ozse ra ╪nûtoa tsî ׀gâb ║khāb khami !haradi âda ׀khai!nâ.” tib ge danakhoeba tsûsase gere ║gâi╪uisen.
׀Nî ╪gari-aon ge ûitsamaxūn âna gere doe-ū !gâi ׀nanuba ge !khō!oa !âga !oa ׀nîsin xū-i xa nî ībahese. Dana !Hū-omkhâis Khora╪uis ╪Ansabeb, Kunene ׀kharib !nâb, Eugene Simwanzab ge ge -║awo║awo nē ׀kharib ║khawa ׀khurub mâsib xa a !khō╪gāhe ║khāsa hânab ga ׀nanub mâsiba ׀khara tama nî is karao. ׀Nanub ge ׀khais ׀khāsa !kharu ge !nona kurigu !nâ Kunene ׀Kharib !nâ ge ī i tamas ka io kaise ╪kharirose ׀nōhe ║oas tsîna īse gere ║nā.
“׀Nanub hîan ge ╪gari-aona ║haima, kai tsî nē ׀gomse gere !âubasenni ge ║nā tama hâ tsîb ge !aoba sida ║aega ׀gaisase hâ ׀khuruba da ra mû!goaxa xui-ao. ║Khās ║khāsa !hana╪gā-aon hîa !nona !nādi kōse ║khawa !hanaga gere ╪gāna ׀nanuba hō tama i tsîn gere ║ō amaga. Simwanzab ge ge mî, nausab ║îba ra ╪gom !khaisa ׀nanub nî !gâi!nâse ║aegub !Hoa╪khaib dib kōse ║nās kara tsî tsēs hoasa saogubese, ob ׀gaisa ׀khara׀kharasiba ║în tawas tsîna a hâ║khāsa. ║Îb tsîn ge nausa a ║axa !nari╪oade dī tsî kōsa mâtib mâsiba ra mûsen !khaisa.
׀Nanub ge sao rase ge ׀nōhe: Otjisokotjongavas hîa 10 kilometerga Opuwos ׀awas ׀khāb ai ║goesa 345 milimeterga. – Nampas