I Kae Matundu-Tjiparuro
OTJOMUISE
Okanepo kOmbongarero yOtjiwana ko Swapo, Hidipo Hamutenya, waraisa pombongarero yozombuze muno kutja we riisamo mombongarero indji nawina mo Swapo.
Ombongarero yozombuze indji ndjananene ombango yovengi motjiwana pendje novawonge vozombuze, yazuvakere kutja oyoku tjiukisa otjira otjipe ihi Rally for Democracy and Progress (RDP). Hamutenya watjere inga yari omazuvira woposyo nungwari oyo kutjivisa omapitiro we mo Swapo na mOmbongarero yOtjiwana. Watjere ngunda eye keyirupura kutja nambano mahungama pi motjitamba tjopolotika nu natja una oure wotjiveke okuripura kutja merikutu ko RDP poo inde. Watjere o RDP mairitjiukisa kotjiwana tjiyeri 17 komweze imbwi nu auhe nguna ohura yo kwiitjiwa ngahungame ingo makazuve ovingi. Oruveze noiri maitjiukisiwa kombunda. O RDP otjiveke tji tjazuko otjiyeritjangisire kOtjirata tja Namibia tjOmatoororero.
Watjere ndoovazu omundu wavaza pona puwerihaka motjina puu hina okuyenena okunyinganyinga nu puu hina kuyenena okuryama komurungu nu pupena “omutongatima wo kuhara omasa” kona omwano warwe pendje yo kuripahera ozondjira zoye.
Hamutenya watjere omundu tjimovanga okuyinganyinga pona puuri utara kovinenge vivari. Okongaro yopona pumovanga okuzapo nawina kourizemburuka wovandu mberi pona imbo. Otja kuye imbi aviyevari nambano vyeurisiwa kutja eye mayenene okunyinganyinga nu mazamo mo Swapo. Tjapurirwe kutja pena ovandu varwe mbena ondando yokupita tjingeye watjere mahaka nao na raisa kutja nandarire tjiva vao veri pombongarero yozombuze indji. Tjatjere nao pasekamene ovandu kaatjondumba muwo mumwari Omuhaamise omukuru wOtjirata tjOtjiwana, Kandi Nehova nawina omunane wovaungure omukuru Festus Naholo.
Kepura rokutja Ben Ulenga nai nguri o Presidenta yo Congress of Democrats (C0D) tjaapiti mo Swapo wahuwa eni rokutja omukuramene momurungu wozondando ozombwa nu hapo ndino matja tjike eye tjapiti mo Swapo?
Hamutenya wazirire kutja kanaa petezewa rimwe romambo ngaa yepose nao kutja ra posisirwe iye. Kepura rokutja hapo okupita motjira oondjira ndjiripo kapena ondjira yarwe, eye watjere otjira tjasirira nu katjina ourizemburuka oupe nu munao oruveze otjirwahoro okuzamo mutjo. Watjere eye kerimba okuritjatisa poo okupaha pona parwe pumahitire kutja marire omutjate nungwari tjavanga okurira omundu karive eye una womahongero omawa mombwiko nu mayenene okuhita motjitamba ihi narire omutjiukwa.
Komambo ngumayetja o RDP maiyeta oruzungo mehi mena rokutja otjiwana katjiyavaza ondondo yondjindasaneno mopolotika, Hamutenya watjere inga omaukiro wovauke aruhe mbemuna kutja kapena ouwa. Watjere katjikando otjitenga o Namibia okuhara otjira otjipe tjopolotika. Peya o CoD, o Nudo no Republican Party posyo apehakara oruzungo. Tjapurirwe kutja watjivisire oo une kutja mapiti mOmbongarero na mo Swapo watjere rutenga watjivisire oserekaze ye naimba mbasere okutjivisa Oritjatatu. Momatjivisiro we inga pari mbaa vemunu kutja ongwaye tjehina kuundju mena rokutja umwe waimba mbaa vehahaama pomurire umwe mo Swapo watja maheruka kotjihavero. Hamutenya wapurire kutja “watja maheruka poo maheruka?”
Komurungu watjere eye nai ouyenda we wa tanda nu kauna omatjeyerero nu kutja karive mamunu kovi kapena ombatero.
Pondongamo potjiriro Hamutenya wari puna okanepo okakuru kOmbongarero yOtjiwna Michaela Huebschle. Varwe ovatjikukwa mo Swapo yari o Ministera Onguru yOzongetjeva nOmambipasaneno yOvirandua, Yesaya Nyamu, Omukuramenepo wa Namibia omukuri ko South Africa, Shapua Kaukunga, omunane omukuri wehika rovaungure vomozongoporo, Festus Naholo na Peter Naholo wina omutjiukwa mo Swapo.