George Sanzila
!Haosi ǂNûs ge ǂâuǀoasasib !aroma ge kō!gâhe ǁgaragu sîsenǂuib âga a ǂhanus di sîsenǁareǁkhāǁkhāsens ǀhaosa Tsoaxubams !nâ go ūhâ i. Kō!gâs !nâ go !khōǂgāsa in ge ǁawosase mîǁguisa ǁgaragu tsî dīǀgaugu, !Haosi ǂNûs sîsenxasigu !naka a he ǁkhā mîǁguigu tsî komitedi ǁgaragu tsîna.
Nē sîsenǁareǁkhākhāsens hîa Konrad Adenauer Stiftungs (KAS) kha ǀhûǁarehâse ge aweǁguihe hâ is ge ǂhanusi ǁkhowa-amas âsa !Haosi ǂNûs di mîgowaba-aob, professor Peter Katjavivib xa ǂoa ge wekheb Wunstaxs ai Tsoaxubams !nâ ge dīhe.
Katjavivib ge ǁîb di ǁkhowa-ams gowaǀîs !nâ a !gāsa kai !khais ge, nē haos di ǁgūbas nēsis kōse ǁîgu xa daoǁgauhe hâse ra sîsenaihe ǁgaragu tsî sîsenǀgaugu di ǁkhawa kō!gâhesa tsî ǁnāsa xu nî ǁawoǁawose isa ǂâuǀoasasib ǀkha gu ǁgaraga nî saohe tsî garu-a ǀkharaǀkharasin ǁhûidi !nâ ra hân tsîna nî gowaǀîsa.
“Sada ǂnûiǂgās ase nau hâ !âkha !Hūb dikha ǀkha ra sîsenǁare î da ǁawoǁawo !hūǁîn ǀgapiǀgau !oabade īǁkhā i as kōse nî !khō!oasa !khais !aroman sada sîsenǀgaugu, ǁgaragu îgu xa da ra daoǁgauhegu tsî dīǀgaugu tsîna ǁnāti nî !hûǁaresa îb !oabade mās sîsenna ǂkhanusib kha !gûǁnâ,” tib ge Katjaviviba ge mî.
ǁÎb ge noxopa a mîs ge, parlements di !gûǁnâgaub, aiǁgause ǁgaragu tsî ǀgaugu ǂgaenam!gâgudi, !hoaǂamhe nî dana!khaidi aoǁguib tsî ǁhûidi tsî parlements komitedi ǁî!nāpe a ūǁkhās dib hâsa, nēs !nâ-ū ǂâuǀoasasib tsî ǂgaoǀkhāsa !harib ai ǂhanuǁguis !gûǁnâgauba īǁkhā kaisa.
Sîsenǁareǁkhāǁkhāsens hîa ǀhaos ge dībahe hâ i dana!khaidi !nâ a ǂansabeb xa gere !khōdanahes ge ǂoa ge wekheb Fraitaxs ai ge !gûǀam tsî parlements di anin, ǂgaeǂguis tsî sîsenaon x age ǁhao!nâhe hâ i. Nē gowaǀîs ǀams aib ge Katjaviviba !ēsa sîsenū tsî tsâbaǁhaosa ge gowaǂui, ǁōǂoas ai!âkam mîgowaba-aob Frene Ginwalab, Republiki Suid Afrikab dib di !Haosi ǂNûs di ge ib tsî ǁhû!aosa professor Rehabeam Ray Aualab, Universitaits Namibiab (Unam) dis dib hâkha ǀaokhoenǁî.