Paulina Ndalikokule

Omutumba gwoHealth Professions Council of Namibia (HPCNA) otagu londodha aakwashigwana mboka ye na ohokwe yokwiilongela uuhaku kaaya ishangithe noshiputudhilo shedhina Devine Health Institute oshoka inayi pewa epitikilo lyokulonga.

HPCNA metseyitho koshigwana okwa ti oshiputudhilo shoka otashi kongo aantu ya ishangithe okwiilongela omayithano guulongwapangi, uunamiti osho wo aagandji yomakwatho gomeendelelo.

 “HPCNA ota kumagidga ngeyi aakwashigwana kutya okwiilongela omayithano ngaka inaku kwashilipalekwa,” ta ti.  

Shi ikwatelela ko-HPCNA, mboka taya ka mana okwiilonga koshiputudhilo shoka itaya ka pitikwa yi idheule miipangelo osho wo yalongemo konima shama yamana elongo lyawo.

“Aantu ayehe mboka ya sikola koshiputudhilo shika momayithano ngaka itaya ka pitikwa okwiidhewula miiputidhilo mbyoka,” ta ti ngaaka.

MuMai nuumvo omushangi wiliki gwo HPCNA, Cornelius Weyulu okwa kumagitha iiputudhilo mbyoka yahala okudheula aalongwapangi yiishangthile noHPCNA opo iilongwa yitalululwe yo yipewe uuthemba yokulonga.

“Ongele owala oshiputudhilo sha pewa omushangwa gwopambelewa gwaza koHPCNA opo tashi vulu oku longa, kombinga yokwiidheula aanasikola ohaya pumbwa okwiishangitha noHPCNA oku za momvula yotango yeilongo sigo yamana,” Weyulu a tile ngaaka. 

 Ta ti aalongwa mboka ngele oya mana oonzapo dhawo opo haya vulu oku tambulwako onga aalongwapangi taya vulu okulonga onga aapangi miipangelo.

Omuvo gwazako iikundaneki oyalopotele kutya oshiputudhilo sho Nursing Training Institute of Technology oshali sha patwa konima sho aantu yagandja omanyenyeto kutya kashali shashingithwa, oya kapewa ishewe uuthemba wokulonga na ngashingeyi ohaya gwandja elongo moWindhoek nOngwediva.

-ndalikokulep@gmail.com