Aantu 18 oya si omaso kaage shi gopaushitwe miipotha yi li 54 ya lopotelwa opolisi mehuliloshiwike lyaPaasa. 

Omaso ngoka oga kwatela mo omaikuthomwenyo, iiponga yiihauto osho wo edhipago. 

Omaimangeleko 

Uuyelele wu li mepeko lyopolisi otawu ulike kutya, oshietithi oshinene shomaso ngoka omaikuthomwenyo, sho aantu ayehe yahamano yomoonakusa mboka ya imangeleka. 

Oonakusa, aakiintu yatatu naalumentu yatatu oye li pokati komimvo 22 no59. 

Opolisi oya holola kutya otayi ningi omakonakono okutala osheetithi sheso lyaBertha Fillippus gwokomukunda Oshaalanganda moshitukulwa shaShikuku, ngoka anuwa a adhika komusamane gwe nondhalate mothingo, a endjelela mondunda yaayenda megumbo lyawo. 

Omusaane anuwa okwa hokololele opolisi kutya okwa li a penduka mo megumbo ongula onene a ka talele po gumwe gwomaakwanezimo lye. Nasho a galuka lwopo 17h00, kee wete omukadhi okwa ithana aashiinda ye mu kongithe ko. Oye mu itsu nee mondunda moka a sa nale. 

Opolisi oya lopotelwa wo omaso gaagundjuka yaali, omumati Hafeni Tulyaameni (24) gwokomukunda Ohamaala mosh itopolwa shaShikoto, oshiwo Beatrice Alicia Brendell nomukadhona (22) gwokOkahandja mboka ya imangeleke miiningwanima yayooloka. Mbaka ayehe anuwa oya kala ye na omadhiladhilo goku ikutha omwenyo. Brandell, nokuli anuwa okwa kambadhala oku idhipaga iikando ya yooloka. 

Omulumentu gwomimvo dhili po40 Aukus Kosimang wokEpukiro, naye wo anuwa okwa ikutha omwe nyo mehuliloshiwike. Opolisi anuwa inayi fekela oshietithi sheso shilwe kaashi shishi sheikuthomwenyo. Omukwanezimo gwaKosimang okwa hokolola kutya oya li ye li puukamba wuli molukanda lwaOzondana, sho Kosimang e ya laleke lwopo15h00 kutya ye otayi kegumbo. Sho aanegumbo. Aanegumbo anuwa nayo oya yi kegumbo lwopo 20h00, ihe oye mu adha mondunda ye a hulitha. 

Tautiko Nghipandulwa (30) gwokomukunda Onandhi, moshitoolwa shaShikoto okwa adhika kaanona yopuushiinda shawo a imangelekela mokaye. Aanona mboka anuwa okwali ya tumwa kaandja Nghipandulwa sho yiitsu moshikulumanene shoka. 

Okwa lopotwa wo eso lya lyomunamimvo 41, Apolonia Mokashwa Shikongo. Omushimba gwomukiintu nguka anuwa owa itsuwa komushiinda. Moonakusa ayehe mboka ya ikutha oomwenyo, Shikongo oye awike kwa hololwa kutya okwa thiga po omukanda ta holola kutya omolwashike a ikutha omwenyo. 

Iiponga 

Kakele koonakusa mboka, aantu yatano, oya si miiponga yiihauto oku za mEtine lyoshiwike shazi ko. 

Oshiponga shotango osho shoka sha ningwa konyala ookilometa11 okuya mOtjiwarongo sho mololi giipumu mumwe. Aantu yaali, yali meloli limwe oya sile moshiponga shoka, omanga omuhingi gweloli ekwao e li monkalo tayi limbilike moshipangelo shaTjiwarongo. 

Omuhingi gwomimvo 34 okwa kwatwa po sho a nyengwa okupangela osheenditho she, e tashi galangata. Moshiponga moka owa hulile omwenyo gwomukokele gwomimvo 79. Otaku hokololwa omuhingi ngoka a patululilwa oshipotha shokuhinga nuuhasha, edhipago lyaashi lyoshiningilawina, oshowo okuhinga e li kohi yondhungo. Oshipoka shoka sha ningilwa pokati koGrootfontein nOtjituuo. 

Moshiponga shikwao, omukiintu Omunamibia nomulumentu Omuzambia oya monithwa oshiponga kohauto ndjoka nayo ya nyenge omuhingi noku gwa ko kopate. Omukiintu okwa sile pehala lyoshiponga, nomulumentu oku li moshipangelo e li monkalo itaayi nuwa omeya. Shika osha ningilwa komukunda Nanyanti moshitopolwa shaKapani, mondjila yokuuka koKatima Mulilo. 

Omulumentu gwomimvo 23 ngoka a li ta hingi keena omikanda okwa patululilwa wo iipotha sho ohauto ndjoka a li ta hingi yagalangata noku dhipaga omuntu gumwe. 

Oshiningwanima shika osha ningilwa pomukunda Onelago popepi nOngwediva. 

Aakulupe 

Miiningwanima yiimbuluma inaayi faathana naambika, aakulupe – gumwe oku na omimvo 67, gumwe 64 namukwao 61 sho taye fekelelwa iimbuluma yapiyagana. 

Omukulupe gwotango (67) anuwa okwa kuthile mo ondjembo omumati gwomimvo 22 noku mu umba iikando iyali. 

Mbaka anuwa okwali taya tanguna pehala lyontumba mOndangwa. 

Omukokele gwomukiintu gwomimvo 61, ye anuwa okwa tulwa miipandeko sho a adhikwa nonailona yepangwe molukanda lwaVolstruis Vlakte moRehoboth. 

Omukwao gwomimvo 64 okwa kwatelwa koongamba dhaAriamsvlei okwa adhika nuumanya wuli 26 taku fekelwa kutya okawe inaaka kweywa. Okwa adhika wo noka shina koku konaakona okawe. 

Aakokele ayehe mbaka aakwashigwana yaNamibia. 

 -hshaanika@nepc.com