Mayola gwondoolopa yaSwakomund Blasius !Goraseb okwa popi uupyakandhi weyindjipalo lyoombashu tadhi pi kehe konima yomasiku omashona mondoolopa ye.

Okuza muJanuali nuumvo oombashu mondoolopa moka odha pi po iikando 22.

!Goraseb okwa ti, omulilo ogwa hanagula po omalukalwa gaakalimo oyendji, shoka sha e ta uupyakandhi wa gwedha po womalukalwa.

“Ondoolopa oya pumbwa omalukalwa geli 300 000. Omanga gaakalimo 22 000 yathigwa pomutenya komililo ga pumbwa okutungwa,” ta ti ngaaka.

Opo uupyakandhi mboka wo mpumbwe yomalukalwa yi kandulwe po elelo lyondoolopa olye ya po noprogalama yoku kongela aakalimo omahala, ya thinaneka oombashu dhawo  konima yomagumbo omakwawo.

Ta ti, omulilo ogwa fike omagumbo ogendji nogwa halakanitha po iinima yaantu, naambyoka itaya vulu okumona we.

“Ongushu yiinima ya fikwa po komililo itayi vulu okutengenekwa, oshoka iinima oyindji ya hanagulwa komulilo,” ta ti ngaaka.

Ta gwedha ko kutya omulilo ogumwe gomomashongo ga taalelwa kelelo yondoolopa.

Ta ti, shalongo pun a kadhimamulilo ngoka a kala nokulonga iilonga inene okuyambindhindha omulilo gwaatandele nondoolopa ayihe.

Opolisi oya popi kutya omulilo ngele gwa tameke okufika ombashu yimwe ohagu taandele mbala okuya koombashu oonkwawo, shoka hashi eta oombashu odhindji dhi pye pehala limwe. 

Oya kumagidha wo oshigwana shi kale tashi kwata nawa omililo nokukwashilipaleka kutya omulilo ogwa dhima uuna ya mana okuteleka nenge okuminikila osho wo okugu longitha. 

vkaapanda@nepc.com.na