Oministera Youkohoke Momapanguriro nOngaro yOvyungura, Fillemon Immanuel, katjisupu wayandjere omatemba kovyombanguriro vyo viwaṋa vyOtjikaoko nOngandjera otjorupa rozongondjero zohoromende oku yandja omasa kokutja ovandu kozombanda vemune omapanguriro omakohoke. 

Immnanuel watjere ondunge indji inondando yokutjita kokutja ovyombanguriro vyombazu vimunikireko na wina kutja omaunguriro wavyo yepwe, tjinene kozombanda omapanguriro kuyehavaza nawa kovandu va kauriri. 

Namunu kokutja ovyombanburiro vinorupa orunahepero okwiisapo orutjiva pokati kovandu va kauriri naimbi mbyasere okuvasisa omapanguriro omakohoke kuwo. 

“Okuyeta oukohoke movyombanguriro popezu novandu, ma tu tjiti kutja pekare oukohoke novandu avehe motjiwana kutja veyenene pupeṱei okuvaza kovyombanguriro,” Immanuel matja. 

Oministera wa wezire ko kutja omiukambo imbwi ma u hitasana nOndando yEhi Oitjahamboumwe yOmekurisiro (NDP6), oyo ndji pambarera omananeno omawangate yaavehe, ombwisiro yomavasisiro wouhokoke mo vyombanguriro no ma pamisiro wotutu two horomende. 

Watjere omasembamisiro no hauzeu ko vyombanguriro vyo tjiwaṋa kehi yOveta yOtjombanguriro yOtjiwaṋa yo 2010, ye raisa omeriyandjero wohoromende oku tandavarisa ovyingura vyo veta no ku nyomona omakarero norupa mo ma naneno. Komurungu wa ṋunisire kutja horomende ye ri yandjera kokutja ovyombanguriro vyo tjiwna vi ungure ousopoke, mondjerera nu ama viraisa ovyungura vyavyo koviwaṋa. Watjere oma yandjero womatemba orupa rozongondjero ozo mbaranga zo ku pwisa ovyungura no ku kondja kokutja oukohoke moveta otjiṋa otjivazewa no tjikarerere nganduu kotutanga twa kandinondi noto ruyaveze. 

Ngunda aperi nao, Ujeuetu Tjihange, orate onene mOuhonapare wOmbazu wOtjikaoko, watjere otjiwaṋa tja kondjo orure okuvaza kovature mena ro kokure komahanduriro. “Ovandu otja tjive turira kokure no kokure, ye rira omatokero okuvaza kuwo, po siya nambano twa kutuka nu tuna ondjoroka oku kara netemba indi,” Tjihange watjere. Nampa