Dalene Kooper
Luderitz -ozinya vana ava ava paruka nourema modoropa zaLuderitz ngesi vana lipakerere vatulisepoi evango lyoyirema omu nye nalivatera vana vawo. Evango eli kwalitulisapo livatere morwa vana kara noudigu womavango eli nalikara asi lyokuvatera vanona ava ava paruka nourema ntani kuvatera nye owo ava vakeverere vakara nomukumo vavatere vanona ava.
Eyi kayigeve nye Anschua Martin, zinya munona gumwe ogu nage aparuka kumwe norema, ano mugendesi gevango lyomoLuderitz lyovantu wokuparuka nourema, posiruwo somudingu gwaPresidente gona Lucia Witbooi apa nye kakadingwire pevango eli sivike sina puko. ‘’ Ose kwatulisapo evango eli vakarepo vana vetu.
Ose kuna kuyimona asi natugwana edeuro lyenene, omu nye natukatekura vanona vetu ava, ngovazinya, kapi tatuvhuru kukatuka, yilye nye ngano navhura kutusikamenapo? Nkenye mbatero nampili mfuto nawa tupu, ntani matungo gomawa oyo ngano nayituvatera,’’ Martin yimo ana kutanta. Evango eli ngesi kuna kara nye pomberewa zakansela evango eli vatulisapo lyokupungwira nondja. ‘’ Ngomureti, kumwe na Emily Bock, ose kuna tokora kutulisapo simwe songandi esi nasivatera vanona vetu, vawize pamwe tupu.
Yivhulise nye asi vahingire tupu membo, vahana kurugana Yuma, kuna kutara tupu TV, ose tuna vareta nye oku, yipo asi turuganeko Yuma kumwe nawo, makura nawo vazogereko novanona vakwawo nokulirongako eparu limwe ,’’ yimo ana kutanta Martin.
Presidente gona kapandwire kegano eli vatulisapo omu ana kufaturura asi evango eli lyomutaro, muna kara eparu negano lyewa.
Age kapandwire ava vana kutakamesa vanona ava, novarugani nye gweyi ava lizambere, nokuhundira nkarapamwe asi varuganene kumwe omu navavatera evango eli, nokunkondo peka sitambo sepangero melikwamo lyangesi. ‘’ Ose none kumwe, kumwe nonkarapamwe, natulituramo tutare asi kurugana ngapi. Ame kuna kuhundira valirongi, vana kara mepitisirio lyoge, mutwikire kugava magano, muvatere vanona gona ava, yimo ana kutanta.
Age simpe kuna kurugurura asi ngapi navavatera ava vana kufira sinka nokutamununa nkarapamwe. Witbooi kageve uhwi wevango lyokulivaterera, yokuzeresesa, evango lyokuzoganena, yitoyili, nomunyambo dovakeke.
Witbooi kahundilire tutwikire kuruganena kumwe, omu natutara asi kwato munona gomuNamibia navasiga konyima, nokutanta asi twahepa kutulisapo muhoko guna kuruganena kumwe.
‘’ Ose twahepa kuza komeho, ose tuna manamo, omu natuyididilika asi kwato munona natusiga konyima, yimo ana kutanta.
Presidentegona simpe kakadingwire evango lyaLuderitz Early Childhood Developmnent Centre, apa nye kakahundilire varuganene kumwe pokatji konkarapamwe kumwe novakurona omu navakeverera nokuwapukurura evango eli.