Omukainhu oo a li e li koshi yodungo, vati okwa imba opolifi iha kwafela omunaudu wopamadilaadilo pefimbo, osho sha eta nokuli a xwike po onduda yaye oshivike shadja ko.
Otaku hokololwa opolifi yali ya endelela ika twala mukainhu weedula 38 koshipangelo konima eshi a lopota kutya ota vele medimo shaashi a nwa ondjabula ya tulwa oudio keendingosho. Pefimbo opo tuu opo, opolifi oya lopotelwa yoo omulumenhu a tukukilwa koudu wopamadilaadilo, nokwali a nyika oshiponga kuye mwene nokovaneumbo laye.
Oshiningwanima osha nigwa Omaandaxa koshikandjohoololo shaNdola moshitukulwa shaHangwena, nomukulunhu wopolifi moshitukulwa Commissioner Ottilie Kashuupulwa okwe shi koleka.
Molwaashi opali ashike pe na otuwa imwe aike, opolifi vati oya tokola opo i twale diva diva omukainhu koshipangelo, yo i alukile omulumehu shaashi kava li tava dulu oku enda moshiendifo shimwe.
“Ka kwa li pena otuwa yoku ya keumbo oko ku na omulumenhu e na oudu wopamadilaadilo shaashi otuwa okwa li yaya komukainhu ou ta ti okwa pewa oudio,” Kashuupulwa ta ti.
Vata ti omukainhu ou eshi a ya koshipangelo okwa monika keendokotola kutya okwa li ashike a kolwa ashike.
Kashuupulwa okwa yelifa ta ti ka kwa li tashi shiva omunhu e na oudu wopamadilaadilo ndele ota ende motuwa imwe nomunhu a nwa oudio, sho osho va tokola va twale tete omukainhu koshipangelo.
Mupya munene omulumenhu oo e na oudu wopamadilaadilo efiku olo okwa li ta kendabala oku li xwikile monduda ye okwali yoo e kwete neonga a hala okutwa ovaneumbo vaye.
Kashuupulwa omukainhu ou okwa mana po efimbo lopolifi shaashi opolifi okwa ngeno oya ya keumbo oko kuna omulumenhu e na oudu wopamadilaadilo.
Okwa kumaida oshiwana opo shi xulife po okulongifa opolifi oinima yoipupulu.
“Ovanhu nava lopotele opolifi oimbuluma yoshi li ndele haku popya oipupulu,” ta ti.