ONGWEDIVAS - !Hūnāsi ǂHanusi Xoamâisens Direkteri, Ministeris !Hū!nāsi ǁHōn dis dib Collens Mulekeb ge ra mî, ministeris 44 000 ǁgauǁgausen kartdi hîa ǀhonkhoen xa ūǁnâhe tamadi ǀkha ǂnôasa. Nēs ge hoan xa a kai ǁgoaǂuis nē ministeris ǂnôa-ūsa, tib ge Collensa ǀasa beros hîa !nae ra ǀgôarona xoamâis ase ge Ongwedivas di Medi Parki !nâ, ǂoa ge wekheb Mantaxtsēs ai a ǁkhowa-amhes di -ǁaxasib tawa ǁhao-aona gere ǂanǂan. 

ǁÎb gere ǀgonǀgon!gao !khais ge ǁgauǁgausen kartna ǁgâi kais buruxa marisa ministerisa ra ǂgansa hîan khoena ǁîn ǁgauǁgausen kartde ǁaeb ai ūǁnâ tama ra isa. “Nēpa da ǁgauǁgausen kartde ra ǁgâi-ū maris ge ǀnî hâ xū-i !aroma ga sîsenūhe hâ, aiǁgause ǀasa berosa !Hū!nāsi ǁHōn !aroma ǂnuwisa,” tib ge Mulekeba gere ǀgonǀgon!gao. Nausab, ǁ-îba gere !gara!ā !khais ge, ǀawas ǀkharisi !hū!nāsi beros kaise ǂgui !gôab ūǁnâsa tama ǁgauǁgausen kartdi ǀkha ǂnôasa hîa khoen di !nū !garo!ā !âgu !nâ ǁans xa ra !aromahesa.

 “ǀGâsib tsî !nūse hâs nē berode xus ge a ǀgui !gomsi hîa ǁgauǁgausen kartdi di ǁaeb ai ūǁnâhe tama isa ra !aromasa.” Mulekeb ge nē mâsiba oresa hōbas di dītsâdi ase gere ǂgan, in khoena xoamâisen kara sī -aegu ai nē berode ǂanǂan mâpan ǁîn di -ǁgauǁgausen kartde nî sī-ūbahesa in supuse ǀgūǀkhā ǁkhā. 

Hana-i khoe-e, aiǁgause Rundus !nâ ǁgauǁgausen karts di ǂganamsensa dī hâ, xawe Outapis !nâ nî ūǁnâse ra ǁkhore, o-i ge berosa ǁnā -ǁaeb ai ti gui nî mîba, os ge ǁî-i ǂgansa ǁnāti nî dīǀoaǀoahe,” tib ge gere -ǁgui!ā. Mulekeb ge noxopa a mîs ge, ǁîn ǀgūǁae ǀkharisi ǂgiǂgosi ǀawemā-aon ǀkha ǁgamǁarede nî tsoatsoasa, in khoena -în ǁgauǁgausen kartde ǁhûi!nâharidi berodi tawa ūǁnâs ǀkha huihe. 

ǁKhātib ge Mulekeba ǁîb ǂâiǂhansena Ohangwena ǀkharib di ǀgapi !gôab (1 600) !onkhaohâ ǂganamsendi !naes sertifikatgu didi ǂnamipe gere gowaǂui. Xūn hîa nē mâsiba ra !aroman aseb ge -ǁîba ǀgâsib, ǀgôarona ǁgâudi tawa ǀgora!gâs tsî !hao!nāsi ǂgomaidi tsîna gere ǂgaikhâi.Mulekeb ge !hūǁîna gere ǀkhoma, !naes ǀkha ǀgôana xoamâisa, ǁîs a ǂhâǂhâsa amaga.