Omukulunhu poshitaashi shomaholi shoShell okwa dengwa nondjebo nokunyekwa oshimaliwa shongeshefa osho a hangika ta twalwa kombaanga.

Oshiningwanima osha ningwa Etitano poshitayi shombaanga yoBank Windhoek mOshakati efimbo longula lwopotundi 09h00. Opolifi oya ti oshimaliwa sha nyekwa ko otashi tengenekwa shi li pomwaalu N$16 000. Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa hangika e li ofika poshivelo shombaanga noku ponokelwa kookalyamupombo vatatu vovalumenhu.

Va ti nakuninga oshihakanwa okwa dengwa nondjebo moshipala.

Opolifi oya hokolola tai ti ovafekelwa ova faduka nokulonda motuwa i na omakende malaula oyo ya shingwa ya yuka kombinga yoKahao. Opolifi otai indile moshiwana kwau e na ouyelele kombinga yovafekelwa ve li motuwa yoCorolla Toyota yomakende alaula opo oshiwana shi lopotele opolifi keshe i li popepi.

Aiyambo okwa ti opolifi itai ka popya edina lomunhu ta ka yandja ouyelele onghee oshiwana nashi kale sha manguluka okuyandja ouyelele. “Ovanhu nava kale tava pula ekwafo kopolifi ngeenge tava i kombaanga opo va findikilwe kovapolifi shaashi oilonga yovapolifi okutula po eameno,” Aiyambo ta ti. Okwa kumaida oshiwana opo shi xulife po okukala tashi li endele ngeenge sha umbata oshimaliwa shihapu. – fhamalwa@nepc.com.na