Victoria Kaapanda
Tresia Sheehama gwomimvo 26, okwa tsuwa nomwele iikando ihetatu nokudhipagwa kukuume ke komiihole. Oshiningwanima shika osha ningwa Omaandaha, momudhingoloko gweEtayi. Omukuluntu gwopolisi moshitopolwa shaMusati Commissioner Titus Shikongo okwa ti, oshiningwanima shoka okwa li sha holoka potundi 06h00 yongula momukunda Omutundungu moshitopolwa shaKalongo.
Nakudhipaga nguka oye Joshua Haileka ayambukile momukunda Onamhindi moshitopolwa shaMusati. Otaku hokololwa kutya Sheehama naHaikela oye na uunona wu li uyali pamwe, mboka u na omimvo ne nomimvo heyali. Shikongo okwa hokolola kutya Haikela okwe ki imangeleka konima yokulonga iilonga mbyoka iiluudhe. Ta ti, omulumentu ngoka okwa li a yi kegumbo lyomuukiintu uusiku wOsoondaha, ihe kakwa li e mu adha mo megumbo.
Otaku hokololwa kutya okwa li a tegelele Sheehama mondunda ye, sigo a galuka ongula ndjoka yOmaandaha. Shikongo ta ti, Haikela ngoka okwa li a ponokele Sheehama, konima ya nyanyeta, sho a li anuwa a pula kutya okwa lala peni noku mu tsa nomwele sigo ta si. Sha ikolela kuuyelele wa gandjwa kugumwe e ya shi nawa, anuwa ookuume mboka oya li ya monika Osoondaha pamwe komayigidho gohango yagumwe gomokuume kawo.
Otaku hokololwa kutya okwa li ya zi ko pamwe, ihe kape na uuyelele kutya oya ka topoka ngiini. Anuwa okwa li taya monika ye na ombili, nokakwa li pe na omayidhidhiliko taga ulike uupyakadhi pokati kawo. Shikongo okwa ti, omulumentu ngoka okwa li i imangeleke nongodhi momuti, momukunda Ohamuti, ngoka gu li anuwa popepi naangoka a dhipagele Sheehama edhipago lyi nyanyaleka.
Moshiningwanima inaashi faathana, omulumentu gwomimvo dhopokati gwedhina Elias Elias, okwa si sho a li a dhengwa noshiti momutse kukuume ke, mOlyomakaya momudhingoloko gwaTamanzi. Shikongo okwa ti omulumentu ngoka okwa ka hulithila moshipangelo shaKahao esiku lya landula ko. Otaku hokololwa kutya shoka sha etitha omanyenyeto pokati kookuume mboka yaali, inashi tseyika natango, no kape na natango ngoka a li a mono sho taya nyenyeta. Omulumentu ta fekelwa moshiningwanima shika okwa mangwa po nomakonaakono gopolisi oge li metifa.