Victoria Kaapanda
Kansela gwoshikandjohogololo shaShikuku, Mathew Gabriel okwa ti, ota pandula aanyasha oshowo aakalimo moshitopolwa shaMusati sho taya dhana onkandangala ombwaanawa muunafaalama. “Ngele owa tala kooha dhopate akuhe hoka, oto mono iikunino yiikwamboga ya yooloka, shoka tashi ulike kutya oyendji oya kutha ombinga noya itula mo,” ta ti ngaaka. Ta ti, oshitopolwa shaMusati okuza omumvo gwa yi inashi mona uupyakadhi wondjala, oshoka aakalimo oya longa noonyala dhawo momapya oshowo miikunino.
Selma Shekutamba a yambukile momukunda Oshitutuma okwa ti, uunafalama owe mu kutha moluhepo. Shekutamba oku na oshikuninino shiikwamboga, oshowo oshikuku shoondjuhwa. ”Oshikunino shandje onde shi tameke omimvo ndatu dha piti, ihe sigo ompaka otashi ende nawa,” Shekutamba ta ti ngaaka.
Ta ti, kakwa li oshipu okuya po noshikunino, ihe okwa li a kondjo a mana mo, oku shi kaleka po nonando a tsakaneke mo omashongo ga yooloka. “Ooshikunino opo wu shi kaleke po owu na okukala omunankondo oshowo omwiifupipiki, oshoka ngele oho sholola mbala ito shi pondola,” ta ti ngaaka.
Shekutamba moshikunino she okuna mo iikwamboga ngaashi omatama, oonyanga, oomboga dho maludhi agehe, uunawamundesha no sho tuu. Ta popi ta ti, ota dhimbulukwa omuvo gwa yi sho kwa li omatama ge ga ponekelwa kokambaambala hoka ka li ke ga hanagula po agehe. “Okonyala kwa li ndi sholole oshoka omatama gandje okwa li ogendji, nokwa li nda yalula okumona mo oshimaliwa shi thike N$30 000, ihe inamu za nando osenda yimwe,” ta popi ngaaka.
Shekutamba ta ti, okwa li nda pululula mbala, ee tamu tamukulula, ihe ethimbo ndika okwa li a kondjo nokusinda okambaambala nomiti a li a longitha. Ta gwedha po ta ti, ngashiingeyi oshikunino she ohashi vulu oku mu etela oshimaliwa sha gwana okuyambidhidha aakwanezimo ye oshowo okukandula po omawupyakadhi ga yooloka. Ta ti, okwa kuta aaniilonga ye li yane mboka haya longo moshikunino she.
Shekutamba okwa ti, oshikuku she shoondjuhwa okwa tameke nasho mo2019, nuuyuhwena 20, ihe nena ota ti, oku na oondjuhwa 300 moshikuku she. Ta ti, oondjuhwa dhi li 80 okwe dhi landitha mo oshiwike sha zi ko. Ta popi ta ti, ngaashi ethimbo ndika lyiituthi oondjuhwa ohadhi landwa nawa.
“Otandi kumagidha aanyasha ya thikame nena, ee taya ka nyangadhala naashoka taya vulu. Omutumba ethete, oshimaliwa ihashi iyeta shoshene, ihe ohashi kongwa,” ta ti ngaaka.