Victoria Kaapanda
Oohanona dhaakwanambwiyu odha si eso lyi nyanyaleka sho dha pile mondunda yokulala mehuliloshiwike. Sha ikololela kiiningwanima ya holoka mehuliloshiwike, oshiningwanima shoka osha holoka momukunda Okankete momudhingoloko Etayi.
Otaku hokololwa kutya oohanona ndhoka ndhina omvula yimwe okwali dha kotha, ethimbo omulilo kwali gwa yaka ondunda moka kwali dha lala. Opolisi oya ti, omulilo ngoka okwali gwa etwa ko kamwayina kaakwanambwiyu komimvo ndatu, hoka kwali anuwa taka ndhana nokaplwa.
Ya hokolola kutya, aanona mboka ayehe okwa li yeli metononatelo lyomumwayina gomumati gomimvo 12 omanga aakuluntu yali ya yi kiilonga. Otaku fekelwa okapalwa hoka kwali ka kwata omalapi go kombete hoka kwali kwa lala oohanona ndhoka, nokufika ondunda.
Oohanona odha tseyika nomandhina Loide naKatrina Kanyanga. Omwendhi gwa ziko aakulupe yaali okwali yasi sho ya pile moondunda ndawo ndhoku lala. Omukulupe gwomimvo 97 okwa si eso lyi nyanyaleka sho a pi po thiluthilu, sigo a lunguna po komulilo ngoka kaagu shiwike kutya ogwa zi peni. Omugandji gwomauyelele gopolisi moshitopolwa shaShana Thomas Aiyambo okwa ti, oshiningwanima shoka osha holoka momukunda Okamule moshitopolwa shaShana.
Otaku hokololwa kutya omukulupe ngoka okwa li a lala oye awike, onkene kakwa li a monika mbala opo a yambidhidhwe. Gumwe gomaakwanezimo ye, Shilongo Reinhold moonkundathana noshifokundaneki shika okwa ti, ondunda ndjoka okwa li ya monika ya yaka omulilo koongula lwopotundi 04h00.
“Omulilo ngoka kagu shiwike kutya ogwa zi peni lela, ihe oshoka otu shi kutya okwa kala omuhili gwomakaya, otatu fekele kutya pamwe okwa li a tema ekaya, ndyoka olyo lyi na okukala lya eta omulilo,’’ ta popi ngaaka. Reinhold ta ti, otaya fekele kutya pamwe okwa li a tenteke okati kokapalwa pomalapi, ngoka ge na okukala ga kwata omulilo. Ta ti, kakwa li pe na ngoka u vu ewi lye, oshoka ethimbo ndyoka aantu megumbo okwa li ya kotha.
‘’Kape na shoka sha hupu mo mondunda, omutoko ashike gu li po, nolutu lwe olwa pi po thiluthilu,’’ ta popi ngaaka. Nakusa okwa tseyika nedhina Niiwale Neepo. Natango omukulupe gwomimvo 73, ena uulema okwa si sho anuwa a pile mombashu ye omwendhi gwa ziko. Sha ikolela kepeko lyopolisi oshiningwanima osha holoka moshitopolwa shErongo kOmatjete momukunda Okarui Okape.
Otaku hokololwa kutya omukulupe ngoka okwa li a pile megumbo lye lyoshipeleki, moka kwa li hazi oye awike. Opolisi oya ti, ombashu ndyoka okwa li ya hwama omulilo sigo yapipo thiluthilu omanga e li meni. Olutu lwe kalwalitalu vulu oku tongololwa oshoka nalo olwa pipo thilu.
Otaku fekelwa olamba ndyoka kwa li halongitha yomahooli kwa li ya topa nokufika ondunda ye yokulala.Nakusa okwa tiwa oye Mathias Tjirimezumo. Aakwanezimo ye oya tseyithilwa. Opolisi oya kumagidha oshigwna shi kale aluhe tashi sile aanona oshowo aakulupe oshimpwiyu, oshowo okukwashilipaleka kutya oyeli ko kule nomililo, okuyanda uupyakandhi wa tya ngaaka.
Caption: Ohanona oonkwanambwiyu dha si sho dha pi komulilo.
Ethano otali ulike ashike