Omupopiliko moombelewa onene dho shitopolwa KoKavango gokuuninginino Salomo Tenga okwa ti, oshitopolwa osha ndhidhilike aanona oyendji ya ningi iihakanwa yoku ninga omateelelo noku thiga po oosikola.
“Sha ikolela kuuyelele wa gandjwa, momumvo 2020, oshitopolwa shetu oshali sheya oshitiyali shi na aalongwa ye li 554 omanga oshitopolwa shaMusati shi na aalongwa ya ningi omategelelo ye li 564,” ta fatulula ngaaka.
Ta ti, omvo gwayi aalongwa ye li 520 oyali ya lopotwa ya ningi omategelelo omanga ye li moosikola moshitopolwa shaKavango uzilo. Ta gwedha po ta ti, uupyakandhi mboka owa pumbwa okukandulwa po meendelelo, oshoka otau ende uuka komeho.
Omunambelewa omukuluntu gwelongo moshikandjohololo shaKavango gokuzilo Dolf Mureni okwa ti, omategelelo mokati kaalongwa oga tsikile okukala uupyandhi moshitopolwa shawo.
Mureni okwa ti, omategelelo inaga longekidhwa ohaga yonene aalongwa oyendji oosikola, sigo ye yi thigi po.
“Nonando aalongwa ya kala noku kondjelwa okupewa omalongo gokwi ikaleka komilalo inaadhi longekidhwa, omuyalu oguuka ashike pombanda,” ta fatulula ngaaka.
Okwa lopotwa aalongwa yo momundhingoloko Mukwe ye li 87 ya ningi omategelelo omanga ye li moosikola. Yoko Kambimba oye li 10, Shinyungwe 36, Ndiyona 71, Shambyu 149, omanga momundhingoloko gwaRundu ye li 167 ya ningi omategelelo.
Aalongwa ayehe mboka ya ningi omategelelo ye li 423 oyeli natango moosikola omanga ye li 97 ya thigipo oosikola.
Omuhungimwenyo koshikondo shelongo moshitopolwa Marthinus Hamutenya okwa ti, omategelelo mokati kaalongwa oga kala uupyakandhi oshoka aalongwa inaya iitulamo we miilongwa yawo.
Ta ti, oya ndhindhilike kutya epato lyoosikola omolwa omukithi goCovid-19, okwali lya eta uupyakandhi mboka, oshoka aalongwa ka kwali yena sho ya ipyakindhila nasho, oshowo omaupyakandhi goshimaliwa ogali ga holoka ethimbo ndyoka.
“Omikalo dhimwe dhomithigululwakalo dhimwe odho dhali dha shololitha aalongwa yamwe ya ikeelele okuninga omategelelo. Onkene otandi kumagidha omalelo gwopamuthigululwakalo ga gandje omapitikilo opo aanona ya kale taya longitha iikelelitho okuaaninga omategelelo inaga longekidhwa,” ta kumagidha ngaaka.
Ta ti, aalongwa ngele oya kala taya igamene niikelelitho okuza kiipangelo, omaupyakandhi gwomategelelo mokati kaalongwa otaga ka shuna pevi, naalongwa oyendji itaya ka thiga po oosikola.