Victoria Kaapanda

Omupeha kuluntu gwelelo lyondoolopa lyaNgwediva Immanuel Nakale okwa ti, oongunga dhomeya oshowo iihohela ayihe kumwe oyina oshimaliwa oomilliona N$61.8. Nakale ta ti, uuna aakalimo itaaya futu oongunga dhawo oshowo omayakulo ngoka haya pewa, ohashi ya tula ondoolopa muupyakadhi woongunga.

“Otwa ndhindhilike kutya oyendji ye na oondjo aakalimo mboka haya kambandhala ngaa noongeshefa. Ohashi kala shili nawa aluhe okufuta omayakulo pethimbo, okukwathela wo elelo lyondoolopa kaali ye moondjo,” ta ti ngaaka.

Ta ti, oondjo odha tameke okuya pombanda unene konima yetukuko lyoCovid-19. “Okuza omimvo dha piti omanga omukithi ngoka inaagu ya, ongunga okwa li hadhi kala ashike kohi yoomilliona N$40,” ta popi ngaaka.

Nakale ta ti, elelo lyondoolopa ota li ka teta ko omeya oshowo okuhulitha po okugandja omayakulo kaakalimo yena oongunga dhelelo lyondoolopa.

Ta gwedha po ta ti, shoka itaye keshi ninga ya hala oku shi ninga, ihe otaye keshi ninga onga omukalo goongunga dhi futwe. “Ngoka ogo ashike omukalo hagu enditha aakalimo yafute oongunga dhawo,” ta ti ngaaka.

Ta ti, elelo lyondoolopa ina li hala okukutha oonkatu dhimwe okukondjitha aakalimo yafute nenge lyi gandje ompito komahangano gokukonga oondjo.

“Onkene kehe omukalimo gomOngwediva inaa futa omayakulo gelelo lyondoolopa neshininge meendelelo, okuyanda okutetwa ko komeya oshowo omayakulo galwe. Maria Shigwedha gomOngwediva moonkundathana naKundana okwa ti, ohokwe yokufuta iifuta yawo yokomwedhi pethimbo oye yi na, ihe oshimaliwa otashi nyangwanyangwa.

“Oongeshefa dhetu itadhi ende we nawa, omolwa uupyakadhi wu shiwike oshilongo ashihe. Nena ota tu ningi ngiini,” ta pula ngaaka. Ta ti, out na okufuta, ihe otatu kala ta tu gandja ko sigo twa gwanitha oshoka itatu gwanitha we okufuta oshimaliwa ashihe pethimbo limwe.

“Otwa kondekwa komaupyakadhi ogendji, onkene ohatu gandja ashike iitata opo tu tsikile komeho,” ta popi ngaaka. Shigwedha ta ti, elelo lyondoolopa na li ya indhindhimikile, oshoka nayo hasho ya hala.

– vkaapanda@nepc.com.na