Aanafaalama yiimuna oyendji monooli oya tembukile kombinga yuumbugantu woshitopolwa shaShana, taya kongo uulithilo wiimuna yawo, omolwondjala oshowo enota lya etwa komvula inaayi loka.
Aanafaalama ya za kiitopolwa Omusati oshowo Oshana oya ka dhika iigunda okuhupitha iimuna yawo oshoka komidhingoloko dhawo oku na oluhepo lwomwiidhi. Ngoleneya gwoshitopolwa shaMusati Erginus Endjala thamuna kutya onkalo oya nayipala, nongele otayi tsikile yi li ngaaka, otashi ka hulila muuwinayi. “Aanafaalama otaya ka kanitha iimuna yawo, omolwondjala. Out li monkalo kaatu na nkene tu na okuninga, ihe otwa tegelela ashike shoka tashi holoka,” ta ti ngaaka.
Endjala okwa ti, shoka tashi yemateke ooshoka kutya, pomahala mpoka pe na uuluthilo, pe na omwiidhi, hapo pe na omeya. Iimuna oya pumbwa okukala tayi li oomwidhi yo tayi nu omeya ga gwana opo yi paluke. “Otwa kanitha omukumo, nonkalo otayi ende ya uka kuuwinayi esiku kehe,” ta ti ngaaka.
Johannes Kaali ngoka e na ohambo kOmapale okwa ti omayinyengo gaantu oyendji unene koombinga dhawo, oshinima itaashi pelwa omuntu ombedhi, oshoka kehe gumwe kegulu oku wete ko.
“Omvula ndjoka inaayi loka oya etitha omangungo gaanafaalama yiimuna okuza komalukwalo gawo okuhupitha iimuna yawo,” ta popi ngaaka.
Johannes okwa ti aanafaalama taya kongo uulithilo wiimuna yawo oya ponekele moshikandjohogololo shawo, hoka kwa talika oko ku na ehala enene lyi na omwiidhi. Silas Shekutaamba okwa ti okwa tembukile momukunda Othingo popepi nOshakati oshoka komukunda gwawo kOnampira kaku na omwiidhi.
“Omvula oya kala ashike tayi loko mbela moondoolopa, ihe komagumbo gomiti inayi loka ko nawa,” ta popi ngaaka. Sam Shikongo ngoka e na ohambo yiimuna moshikandjohogololo shUuvudhiya, okwa kumagidha aanafaalama aakwawo ya tameke okulanditha iimuna omanga kuyele. “Tamekeni okulanditha iimuna omanga yi na ongushu, tayi vulu okuza oshimaliwa shi li hwepo, shi vulithe okutala oshimuna tashi isile, inaashi za oshimaliwa nando,” ta kugidha ngaaka.
Ta ti, aalandi yiimuna nayo naya lande sha ikwatelela koondando dhongushu yiimuna, ihe inaya kengelela aanafaalama, oshoka kaye na nkene ye na okuninga. “Aanafaalama nayo naya kale ya kotokela aalandi yiimuna oshoka otaya vulu okulongitha ompito ndjoka okukengelela aanafaalama,” ta ti ngaaka – vkaapanda@nepc.com.na