Aakalimo yomOerwood, moshikandjohogololo shaGuinas moshitopolwa shaShikoto, itaya ka monena we omayakulo gopauhaku okuziilila kohi yomiti nenge miihauto.
Kansela gwoshikandjohogololo Marthinu Elias Kainda okwa ti, aakalimo yomomudhingoloko Oerwood oya kwathelwa kehangano lyoohi ta li ithanwa Noble konima kansela a li a pulwa kehangano ndyoka kutya oya hala okuyambindindhwa nashike.
“Okwa li nda totha mo omaupyakandhi ga taalela oshigwana moshikandjohogololo shetu, ngaashi okutungilwa omalukalwa ge li hwepo nando oniipeleki, sho kwa li nda ndhindhilike kutya oyendji oya tungu omalukalwa gwawo niinayilona,” ta popi ngaaka.
Ta gwedha po kutya ehangano olya li ya mukula kutya ohokwe yoku yambindhindha naashoka tashi pulwa kuKansela oye yina, ihe otaye ke shitula miilonga manga.
Taya ti, mongaashingeyi otaya vulu ashike okukwathela nekonteyina lyoku yambindhidha nomayakulo gopauhaku.
Kansela okwa ti, ekonteina okwa li lya gandjwa koshigwana Omandaha goshiwike shika.
“Shika otashi ka yambindhindha noonkondo noku eta omalunduluko momundhingoloko muka. Aantu yandje oya kala taya mono iihuna ethimbo ele, unene kombinga yuuhaku,” ta ti ngaaka.
Ta fatuula ta ti, oshigwana itashi ka enda we iinano iile okukamona uuhaku.
“Itaya pewelwa we omiti dhawo poluhayela na kehe gumwe eshi wete. Paife oya pewa ehala mpoka taya kala taya hakulilwa,” ta pandula ngaaka.
Okwa ti, shika hasho oshikando sho tango ehangano lyoohi ta li yambindhindha oshikandjohogololo shika.
“Omvo gwayi, ehangano ndyoka okwa li lyetu yambindhindha niikulya ngaashi oondoha dhoohi 400, ooshako dhuusila 400 oshowo omagadhi gokulya,” ta popi ngaaka.
Omuandjeneki gwomayambindhindho haga gandjwa kehangano lyoohi Vilho Kalwenya okwa ti, ekonteyina ndyoka olya koho ongushu yoshimaliwa shi vulithe N$100 000.
“Okwa li twa gandja omayambindhindho ngoka onga oshinakugwanithwa she hangano lyetu, okukwathele aayelele noompumbwe dhimwe,” ta fatulula ngaaka.
Omukalimo gumwe gomomudhingoloko okwa li a pandula kansela gwawo kwaashoka teya longele.
“Otwa hogolola nawa nani. Kansela gwetu shoka kwa li etuuvanekela okweshitula miilonga no tu wete kutya ota tsikile okutulongela omauwanawa,” ta pandula ngaaka.