New Era Newspaper

New Era Epaper
Icon Collap
...
Home / ADRA ifepa mabasi a110 kalico

ADRA ifepa mabasi a110 kalico

2022-07-25  Staff Reporter

ADRA ifepa mabasi a110 kalico
Top of a Page

Kinney Ndopu

 

Katengo ka ADRA ili mutayi waKeleke Yebuluka Lizazi Labusupa (SDA), neka neulezi mabasi alikana 110 lico, sihulu mazwahule babasina mapampili kuzwelela naha Angola. 

Muzamaisi wakatengo ka ADRA mwanaha Namibia Wilfred Luyanga, naize ponahalo yalukupwe hala mabasi mwatolopo ya Katima Mulilo, nesundile tokwahalo yakuli kufiwe neulo yamasheleñi alikana N$77 000 katuso yakatengo ka Global Fund for Jesus, ili mutayo omuñwi wakeleke ya SDA, ofumaneha mwanaha South Africa. 

Hala lico zeñwi zene neuzwi ki 10kg yabupi bwa Top Score, mafula akutatehisa, litapi zamwamakapa, 2kg yaswikili ni mupunga.

“Nelunze luna ni mungendenge mwasikiliti sa Zambezi, obizwa kutisezo yakuba ni lico kasamulaho waCovid-19, ili one ufelile kweli ye ya Sikulu – kalulo yakuneula lico iyelela ni mungendenge wo. Kanako yabutuku bwa Covid-19 nelulemuhile kuli kuna ni batu babasina mapampili abuizibahazo, sihulu babazwelela mwanaha Angola,” nekubulezi muinasipula wakatengo ka ADRA Moses Muyunda. 

“Kacwalo lukupa mubuso ni balipisinisi kuswalisana ni katengo ka ADRA mwa Namibia, habanze babata kukutiseza fafasi sinyehelo yetisizwe kibutuku bwa Covid-19 hala sicaba sesi shebile,” nekubulezi Muyunda. 

Nabulezi hape kuli neulo yeo ilela kutusa batu babalikana 660 kuzwelela mwamabasi a110. 

“Takazo kikuli kaneulo ye, bakafumana sico nihaili sazazi liliñwi. Zeñwi hanze lilelwa kutusa kuli bafumane sico kuya kuile,” nekubulezi Muyunda. Kwanda kufepa babalapile katengo ka ADRA kana ni mungendenge wakutusa balimi kakubafa lituto ni lipeu kasilimo. 

Kubata kulwanisa bunjebwe, babanca bamashumi amabeli kababane nebafumani lituto kuzwelela katengo ka ADRA.


2022-07-25  Staff Reporter

Share on social media
Bottom of a page