Ombara Otjitambi yOvambanderu, Aletta Nguvauva, novemukongorere va pora ongarero yavo ku notjira otjinane Oswapo.
Mave tja otjira katji toṋe moruyano rwatjo okuvasisa omekurisiro koutukondwa womatoororero wa Pukiro na Tjombinḓe owo nai mbu nanwa i yOswapo.
Posi ya omuworonganise wOswapo mOmaheke, Ruth Kaukutua-Mbura ma tja omapitiro wOmbara Otjitambi Nguvauva mOswapo ku ye nounane worukondwa ya ri aye ya otjombuze ombe. Nu rutenga e ripahere okukahakaena nounane wotjira wondendera nawa ngunda e hi ya twa po ongurameno yorukondwa.
“Tu notutu twotjira pozondondo azehe nu motjiṋa hi, rutenga me hepa okutyasana nokuzuva kotjira mozondendera za Tjombinḓe ngunda ambi hi ya hungirira komapitiro wOmbara motjira. Posi ya otja tji mba hee orutuu rwe rwokuzamo kaaru undjirwa ko kaparukaze” ma tja nao ousupi.
“Otjombara Otjitambi kehi yOvambanderu kehi yOTC (Ovambanderu Traditional Council) nomuṱakame oruveze orure mOswapo, ma tjivisa nai kOvambanderu, otjiwaṋa tja Namibia na kouye auhe mouparanga wawo kutja ami mba vaza pomahaṋikiro wozondjira tji twe ya koruvara rwandje kotjira tjOswapo nopu me nanunine oruvara rwandje ku tjo. Wina me ku ovandu vandje okuworonganena ketambo randje mokunanununa oruvara nouṋepo wawo kotjira hi. ”
“Oruvara rwandje oruhaivaiva norwovandu vandje kOswapo, nandarire oure wozombura azehe nḓa, karu na indu rwa tanaukira motjiṋa tji mo ṱunu ko tjikm twe ya komekurisiro mozondendera tjinene mu mu turira ovandu vandje, tjimuna outukondwa womatoororero wa Pukiro na Tjombinḓe, ovo oruveze orure mba kara ongunḓe yomatoororero kOswapo, nu ku nai mbu hi na omekurisiro okuraisa. Oswapo ngai ze ko ami novandu vandje okundjikambura otjitanga kaorere ngo nu ngai tu zemburuke nokutuvara pu twa sere otjovapandere, overiyandjere nouṋepo ouhaivaive wotjira- ombura ngaa kombura nomatoororero ngaa komatoororero,” Ombara Otjitambi Nguvauva ma tja nao.
Wina ma tja: “Ombongarero onene yomatyasaneno ndji mai tara momapu pekepeke wonḓunino yomuhoko i ri tji ye ri 23 komueze mbwi mEpako, Ovambanderu mu mave katara moviṋenge pekepeke mbya tjama nomekurisiro womuhoko mu wo wina mu mu kara epu romapitiro mOswapo.
Mbi nongamburiro okuura kutja ovandu vandje mave zeuparisa omukambo mbwi nokuhina okukeyakeya mena rokutja oyo ndji kara onḓero yavo oure woruveze orure kutja harukuru tjimanga ku ku he ri kombunda, eṱe otjOvambanderu twa sere okutoora ondyero ondindi ohunga nokuvarwa aayo katu po nomahendekero wetu.
Otjira tjOswapo tjinene tja tomba ozombazu, ozoveta nouvara nomananeno wetu,” Nguvauva ma tja nao.