Victoria Kaapanda

ONGWEDIVA - Aakwanezimo yaRuusa Paulus (23) oye li molukongo olunene sho anuwa a ningi iiwike iyali keewetike. Paulus otaku hokololwa kutya okwali a zi megumbo puAshuupa momudhingoloko gwaShigambo mo masiku 16 gaJuli nuumvo. He, Axel Paulus okwa hokolola kutya omwanakadhona megumbo okwa zimo ethimbo lyokamatango lela, a thigimo omukulupe ngoka ha kala naye.

“Otwa kambadhala okumukonga ko mahala agehe ta tu tengenekwa e na okukala, ihe otwa hulile muunyengwi, no she tumbandamitha noonkondo,” he ta ti ngaaka. Omukulupe okwali a pula kutya otayi peni etango lya toka, ihe anuwa okwa yamukula kutya, otagaluka paife ashike ina galuka sigo ongashingeyi.

“Oshiwike sho tango shoka a kana po pegumbo ongodhi ye okwali tayi lili nonando ka kwali taya mukula. Okwali nda ningi onkambadhala akwatathane nomupambele gumwe, ihe okwali ayamukula kutya ota shuna kegumbo,” he ta hokolola ngaaka.

He okwa gwedha po ta ti, oya thigwa mo malimbililo shaashi uuyuni owaninga uuwinayi nokwiindile Paulus a popye mpoka e li nenge a tume etumwalaka kutya oku li nawa. “Ita tumu thiminike agalukile kegumbo, ihe twa hala ashike a popye kutya okuli momwenyo no kuli nawa, no ngele opena uupyakadhi tawu mu thiminike, na popye opo tu tale nkene tuna okumukwathela,” ta hokolola ngaaka.

Paulus okwa fatulile Kundana tati, otashi kumitha oshoka omukiintu ngoka omunyanyukwi, na ina kala ta ulike ena uupyakadhi tawu vulu okumu kutha megumbo. “Yo nayinakulu ekuvu nela. Ota tu indile etu kuthe momalimbililo, oshoka omukulipe ita kotha we omolwa oshinima shika.

Ta ti oya kambadhala natango okuya ko polisi hoka ali twayamukulwa kutya manga ongodhi ye yali mombepo, ita vulu okukongwa. “Otatu indile wo moshigwana kehe ngoka wushi mpoka pena omukiintu nguka alopotele opolisi yo popepi nenge adhenge koongodhi dhandje 081 302 5330/ 081 142 2939,” ta popi ngaaka.