KATIMA MULILO – Sikwata sa babilaeli nesi cauzi mwamakululu atolopo ya Katima Mulilo kuliba kwakatengo katolopo, ili kone bailo tambeka liñolo la linonge. Mwaliñolo la linonge lene libalilwe kisibuabui wasikwata Rasboom Mweemba, sikwata sibilaela hala kamaiso yeshekesha yaktengo katolopo. Babulela kuli kamaiso ipalelwa kutaleleza lisepiso zefiwa kwabayahi batolopo. “Lulemuhile kuli lisepiso kaufela zakutisa mapurojekiti azwelopili halisika talelezwa, ni kamaiso yatengo katolopo imwa mbwengeya,” kubaleha liñolo la linonge.

Lipilaelo zeñwi zeiputezi mwaliñolo la linonge kizecwale ka: “kubeya bazamaisi falitulo zesayeleli ni zibo yabona. Kulilimanisa babeleki famusebezi kusina mabaka sakata. Nikulyehisa linepo zababatokwa musebezi, ili taba yetisa kuli babañwi bazamaise litulo zesayeleli ni zibo yabona.” Sikwata hape sibilaela kuli masheleñi alikana bolule bamalishumi nasulezwi kulukisa mikwakwa yatolopo, kono litabula seli atumela kusina sesi ezahezi. Siekeza kubilaela hala sialuluti mwakufa mubu wamayahelo ni lisebelezo zehoha mezi amutani zesiala kuba zambwashula. Sikwata hape nesi bilaezi kuli bane balunduzwi kwakomponi ya Lwanyanda ni Cowboy basiala mwalibala kusina tatululo, pula haibonahala kuatumela. 

 Hala zeñwi sikwata nesi laezi zetatama: “Lulaela kuli muzamaisi wakatengo katolopo abeye babeleki falitulo zeswanela. Lulaela kuli lufiwe piho yetezi kuli masheleñi abolule balishumi nabelekile cwañi. Lulaela kuli kube ni lisebelezo sakata zehoha mezi amutabani. Lulaela kuli mubu ulukiswe nikutaba baluwi bamubu. Lulaela kuli balekisi bamwamakululu balukisezwe musika omunca. Lulaela kuli bane bawiselizwe mandu bafumanelwe maino mwamazazi aketalizoho. Haiba litaelo zaluna halina kutalelezwa lukanga muhato oipitezi.” Liñolo la lipilaelo neli amuhezwi kimubakweli kumuyemeli watolopo Chiza Simanga, ili yane asepisize kuli isa kokuswanela.