Chinese ǂhanub ge mîǁgui tsî 100 000 !khāǁkhaede !khōǂgā hâ Covid-19 soǀôa-e Namibiaba ge ǀkhae, tib ge Chinese !hūǂnûǁkhaeba-aob Namibiab !nâb Zhang Yiminga ǂoa ge wekheb Donertaxs ai ge ǂanǂan.
Yiminga ra mîsa !oab ge Chinese ǂhanuba ǁnāti ī huiba ǂgans ǁîb di kurisa !hūb Namibiab dis ai ge oe-am nē ǀkhaeba mās ai. 
Chinese ǂhanub ge ǁkhāti Namibiab tsîna ǁnāti ī ǂhâǂhâsa !khāǁkhaesoǀôa-i hîa nē ǁkhōǁkhōsa ǁōsa ǁkhaubas as era sîsenūhe-i, ǁnā !hūb !nâ ra kuruhe-e ra ǁamaǂgan !hūgu di xoakhâib ai ge mâi. 

Yimingi ge ge mî, ǁîn a ǀhabesa ǀgauga ǂurusib ministeris ǀkha sîsenǂuis ǀkha, mâtin nē soǀôa-e Namibiab ǁga nî sîǂuisa. 
“Nē ǁōs ge ǀgora-e dī tama hâ tsî da ge hoada ǀgui ǂgaub ai hâ ǁîsa !kham!oas ǀkha. ǀGuipa mâǀhaos tsî sîsenǁareb tsîn ǀguin ge a hoarahus !khamūxū nē ǁōs, Covid-19 !kham!oas !nâ,” tib ge Yiminga ge mî. 

ǁÎb ge noxopa a mîs ge, nausab Chinaba !gomsina ra hō!â hîa ǂgaoǀkhāsa ǀnōb soǀôana ǁaeb ai kurusa !khōǂgā hâse, xaweb ge a mîǁguisa aiǂhanubab nî ǀomkhâira !hūga māsa, Namibiab khami, Covid-19 !khāǁkhaesoǀôana ǁamaǂgans !aroma. 
“Nē ǁōs ge noxopa hoa !hūbaib !nâ hâ tsî hoana soǀôana ǂhâba hâ, xawe ǁnāti  sîsenǁareb hîa kurigu ­aeba Namibiab tsî Chinab hâkha ǁaegu !goaxab ge ra īǁkhā kai, nē mâsib Covid-19 dib !nâs tsînab ǁkhā sîsenǁareb tsî !khōǁôaguba ai!hūba nî ǁamsa,” tib ge ge mî. 
ǂOa ge Wunstaxs aib ge ǂUrusib ministeri Dr Kalumbi Shangulaba ge ǂanǂan, Namibiab nau !hūgu ǀkhas tsîna ǁgamǁaredi !nâ hâsa noxopa hāǀaro ra soǀôana ǁamaǂgans ase.”

Covax ǂnûiǂgās xōǀkhā da ge a ǀhawe, !kharaga !hūgu di ǂhanugu tsî Covid-19 soǀôana ra kuru ǂnûiǂgādi tsîn ǀkha !hoaǂharugude ūhâs ǀkha !gau ra 40%gu  !hūǁîn !khāǁkhaesoǀôana hōs !aroma, aiǁgause Chinab, Russiab, Indiab tsî Amerikab hâga,” tib ge ge mî. 
Dr Shangulab ge !hūǁîna ge !khâikhom ama tama ǂhôana !khāǁaesoǀôa-i ǂnamipe !hoasa tsî ǁaesa ǁawosasiba ge mā, Namibiab ǀAe!khōs ǀAwemā!nans hoa ǂgaoǀkhāsa daoǁgausa nî mā tsî ǁîs !naka hoana nî dīhesa.