ONGWEDIVA- Egwo lyomeya lya tseyika nawa nedhina Ruacana Waterfalls moshitopolwa shaMusati, ndyoka hali hili aapashiyoni, ihali nana we aantu ngaashi sha kala monakuziwa. Okwa dhimbululwa kutya pethimbo lyoshituthi shaPaasa shonuumvo, egwo lyomeya lyaruacana inali hila aantu oyendji ngaashi lya kala monakuziwa.

Omunashipund gwelelo lyoshitopolwa shaMusati Andreas Shintama okwa ti iinyangadhalwa yopamahupilo moshitopolwa otayi shongola okweelekanitha nomonale, naamboka ya kala ye na onjodhi yokuninga mo oshimaliwa oya thigwa pomutenya. “Ohokwe yegwo lyomeya olya shuna pevi moomvula ndhika omolwomeya taga ende kashona, ngoka ogo ga kala haga hili aantu kamana,” ta ti ngaaka. Shintama, ngoka wo oye e li kansela gwoshikandjohogololo shaRuacana okwa gweha po wo kutya ehala lya kala lya tseyika nawa lyedhina Hippo Pool, hoka haku yi aantu oyendji komafudho, nalyio wo ihali mono we aantu.

ORuacana oyi li naanaa poongamba dhiitopolwa iyali, Omusati noKunene noyi li pehala mpoka omeya haga tondoka okuza momulonga gwaKunene okuza moAngola okuya mefuta lyaAtlantic, mpoka Angola naNamibia ya topolwa.

Omahala ngoka ge li momudhingoloo  gwego lyomeya lyaRuacana ogo gamwe gomomahala haga talelwa po unene moNamibia.

Kashi shi ashike aakwiilongo  oyo haya mono uuwanawa womahala ngaka, ashike nAanamibia oyendjhi ohaya mono uuwanaw wehala nika nohaye li talele po.

Aakalimo yomoshilongo yomoonoolopa dhokonooli nayo ohaya kala yah ala okutalela po oRuacana omathimbo ga yooloka, ngaashi pethimbo lyomafudho, giituthi ngaashi oohango osho wo ootuula dhoosikola. Pakutala, egwo lyomeya lyaRuacana olyi na iikulundundu, hoka omulonga hagu kunguluka gu uka pevi, moka hamu longithwa wo oonkondo dhomeya ngaka okweeta po olusheno ndoka halu andjaganekelwa kiitopolw yilwe yoshilongo.

Sha ikolelela kuShintama, egwo lyomeya lyaRuacana olyi li kohi yelelo lyUukwaluuhi Conservancy notali nonatelwa komuhoko gwAahimba.  “Monale, Aahimba oya kala nokumona mo iiyemo yawo, unene oethimbo lyiiyuthi iinene,” ta ti ngaaka.

Ta ti aakwashigwana oya kala nokupulwa iifuta kondungu yoonyala yooN$10.00 okuya meni.

“Elelondoolopa olya kwatatahana nomahangano gontumba opo ya imange uukuni kumwe opo ku longululwe ehala ndika,” ta fatulula ngaaka.

Ta uvaneke kutya ehala ndyoka olya pumbwa okwoopalekululwa uuna pen a oshimaliwa. Aahimba mboka ya popi noshikundaneki shoNew Era oya pula epangelo lyi itule mo okuyumudha ehala ndika lyegwomeya.