Kakukutu wopolifi moNamibia Inspector General Joseph Shikongo okwa kumaida ovanambelewa vopolifi ovo tava ka ungaunga neefooloma domaindilo okukuta ovanyasha mopolifi opo ve shi ninge pauyuuki. 

Shikongo okwa ti ovanhu nava longife ouyuuki ngeenge tava kutu ovanyasha moilonga pehe na omunhu ta futwa ombumbo ile ta tula mo ovapambele vaye. 

“Oilonga otai yandjwa ku keshe omunyasha ou a wanifa po oipumbiwa, onghee ovanhu aveshe va wanifa po oipumbiwa nava ninge omaindilo,” Shikongo ta ti. 

Oshivike sha dja ko opolifi oya pitifa omukanda wopambelewa kombinga yekuto lovanyasha moilonga koshikondo shopolifi opo ovanyasha va ninge omaindilo oilonga. Oshiwana oha shi kala tashi nyenyeta kombinga yovanambelewa vati hava longifa oulingilingi ngeenge tava kutu ovanhu moilonga yepangelo omo vati ovanambelewa hava tula mo ovapambele vavo ile tava futwa oshimaliwa shonhumba. 

Neudo okwali kuna ekuto moilonga koshikondo sheedolongo omo kwa li oshiwana tashi nyenyeta kutya ovanhu vamwe itava longo payuuki pefimbo kwa li tava ningile ovanyasha omakonakono nomadeulo. 

Shikongo okwa yelifa ta ti okwa kala noku dengelwa eengodi noshoyo okutuminwa omatumwalaka kovakwashiwana tave mu pula opo a yandje oilonga keefamili davo di kale da kutwa mopolifi. 

“Ina ndi hala okulongifa oulingilingi, ame iha ndi yandje oilonga mopolifi ashike opena omilandu handi landu lwa,” Shikongo ta ti. Onghee okwa ti opena omilandu da tulwa po koshikondo osho hashi ungaunga nekuto loilonga yepangelo. 

Okwa weda po ta ti unene tuu ngeenge ovanhu tava kutwa moilonga ovakwashiwana vahapu ohava ningi oihakanwa yokutulwa mokatoo eshi hava kengelelwa oshimaliwa shavo tava lombwelwa kutya otava pewa oilonga. 

Okwa kumaida oshiwana opo shi kale tashi lopotela ombelewa yaye opolifi keshe i li popepi kombinga yovanambelewa vopolifi tava longifwa ombumbo ile ovanhu ve li ninga ookalyamupombo. 

– fhamalwa@nepc.com.na