Ndika olyo ethimbo epeya ha li mbugaleke omakuti oshowo okuhanagula po omapya noku faalela oomwenyo dhaantu, onkene oshigwana otashi kumagidhwa shi kale sha kotoka ethimbo kehe.
Omunashipundi gwehangano Greenspace Vera Freyer okwa pititha omushangwa kutya, koAvis Dam okwa kala kuna omulilo tagu fike omasiku ga piti.
“Omulonga ngoka hagu ende omeya sigo ondjila yeshina lyokolutenda nondjila yo kuya koGobabis okwa pya thiluthilu,” ta ti ngaaka.
Ta kumagidha kutya oshihwepo ngele oshigwana shi ikaleke ko kule nomahala ngoka manga omulilo tagu dhimi thiluthilu.
Ta ti, nonando omulilo ngoka inagu shiwika natango mpoka gwa zi, ombinga yokuuninginino yoNdama inayi pya.
Okupitila mooradio, ookansela yomiikandjohogololo ya yooloka, oya kumagidha oshigwana shi kwate omulilo nuukeka, opo omililo dholudhi ndoka, handhi holoka okuza pethimo ndika, kaandhi holoke.
“Oshigwana nashi kale sha ndhindhilika kutya omulilo ohagu taandelekwa kombepo, onkene oshigwana nashi kale tashi kondolola omililo uuna tashi tema, nuuna sha mana okutema, okukwashilipaleka kutya omulilo ogwa dhima thiluthilu,” dha kumagidha ngaaka. Ta dhi ti, okukeelela okuvule okupanga, onkene ngele shika osha keelelwa itashi holoka. “Omulilo ogu na okukondololwa opo kaagu holoke, onkene shika nashi tameke okuza megumbo kehe. Oshigwana nashi kunkule omwiidhi pooha dhomagumbo oshowo kehe pehala omulilo tagu vulu oku andjakana gu ete omawupyakadhi,” ookansela taya popi ngaaka.
Ndeshipanda Fillipus gwomukunda Alusaati okwa ti, ethimbo ndika oha li kala etilithi kuyo, oshoka omulilo ihagu ziilile ko, oto mono ashike omulilo gwa yaka mekoye nenge gwa thiki nale megumbo.
“Ihatu kotha we twa mbonyoka oshoka omililo ndhoka kadhi shiwike mpoka tadhi zi. Otandi kumagidha wo natango aakuluntu momagumbo ya kale ya tula nawa uupalwa kaawu dhanwe kaanona,” ta kumagidha ngaaka. Omvo gwa ziko omukulupe gumwe okwa si sho kwa li a fikilwa megumbo konima a li a pi shi nyanyaleka momukunda Ondulu nOmongwa.
“Omulilo ogwa ningi uupyakadhi uunene moshikandjohogololo muka. Omukulupe ngoka okwa li a pi ethimbo kwa li ta kunkula omwiidhi pooha dhegumbo lye, sigo omulilo gwe mu nyenge e tagu mufike,” ta hokolola ngaaka. Ta ti, elalakano okwa li lyoku opaleka pooha dhegumbo lyawo, nomukulukadhi gwe sho a tondoka onkugo konima sho a li a uvu omusamane gwe ta kugu, okwa adha nale a pya shi nyanyaleka nokwa li a ka hulithila koshipangelo.
Etosha okwa li kwa lopotwa lya pya ohekta 487 732 omumvo gwayi.
Otaku hokololwa kutya omulilo ogwa li gwa pimbile unene okuza poomwedhi ndhika dhahugunina dhokomumvo sho ku na ombepo, pethimbo ndika.
Omililo ohagu taandele mbala oshoka omwiidhi ogwa kukuta nogwa ningi ogundji sho omvula ya li ya loko nawa omumvo gwayi.
Okwa lopotwa omulilo kwa li fike omahala oohekta oomilliona 2.5 oshilongo ashihe momumvo moka.
Omukalimo gwomomukunda Oponona Martin Immanuel okwa ti, omulilo ngoka okwa li gwa yaka kombuga, ogwa hanagula po ohambo ye.
“Shika oshinima hashi holoka aluhe omumvo kehe pethimbo ndika. Omililo ohadhi holoka pamukalo dha yooloka, nonando olundji ihaku shuwika shoka sha eta omililo dhimwe,” ta ti ngaaka.
Ta ti omulilo ohagu halakanitha po uushitwe oshowo okumbugaleka ombuga, moka omo hamu hupilwa kiimuna yaakwashigwana.
“Komakuti hoka oku na oohambo odhindji, nohashi kala aluhe uupyakadhi uuna kwa holoka omulilo oshoka iimuna nomalukalwa getu ohaga hanagulwa po komililo,” ta popi ngaaka.
Immanuel ta ti, omililo ndhoka otadhi vulu oku eta ondjala, niimuna tayi si po.
– vkaapanda@nepc.com.na