Ovanafikola kosekundofikola Onesi Secondary School ova tumwa komaumbo Olomakaya molweshina lokupomba onyata la teka. 

Omukulunhufikola kOnesi Secondary School, Junias Shende okwa koleka oshikumungu eshi nokwa hokolola ta ti ofikola oya pata manga shaashi eshina lokupomba onyata itali longo vali onghee paife mofikola omwa talama omeva onyata. 

Okwa weda po ta ti omunino hau ende onyata nao owa fita paife onghee osho shi li eshongo linene la taalelwa kofikola. 

“Ovanafikola otwe va tuma komaumbo shaashi itava dulu okulongifa vali oundjuwo noshoyo oku li kosha,” Shende ta ti. 

Okwa yelifa ta ti osha nyika oshiponga ngeenge ovanafikola tava lyata omeva onyata shaashi eshi otashi dulu okueta omikifi odo hadi dulu okuetwa kekako. 

Shende okwa ti okudja eedula mbali ova kala shito va taalela eshongo lomunino wonyata hau kala wa fita. 

“Okwa li nda shangela ombapila keembelewa dehongo moshitukulwa shaMusati kombinga yeshina lateka ashike fiyo opapa ka pena eshi shaningwa po. Onghee okudja opo onda ninga onghendabala yoku tuma ounona komaumbo shaashi ova pumbwa okukala tava longifa oundjuu noku li kosha,” ta ti. 

Okwa weda po ta ti ovadali otava ka shivifilwa moRadio efiku ounona tava ka lukila kofikola ngeenge oupyakadi ou wa kandulwa po. 

Ovahongifikola ova lombwela Kundana tava ti navo otava i komaumbo shaashi itava dulu okukala mofikola muhe na eshina lonyata ita li longo shaashi navo ova pumbwa okulongifa oundjuwo noku li kosha. 

Ova pula ombelewa yomukulunhuwiliki moshitukulwa shavo opo i kale ya kandula po omukundu ou diva shaashi ovanafikola ova pumbwa okutwikile noinyangadalwa. 

“Ka tuna eshi atu ningimo mofikola. Otwa lulilwa kedimba lonyata,” omuhongifikola umwe ta ti. Omuhongifikola umwe a longo eendodo 11-12 okwa ti ovanafikola ve li meendodo dopombada ova kumwa unene koshikumungu eshi shaashi ovo unene hava tameke omakonakono a xuninwa tete. 

Onghee okwa ti paife otashi dulu okueta edopo ngeenge ova kala ve na oilongwa i li konima. 

Ovadali ve na ounona hava fikola pOnesi otava nyenyeta tava ti ombelewa yomukulunhuwiliki wehongo moshitukulwa shavo oya dopa okukala ya kandula po omukundu ou diva shaashi oya kala noku lombwelwa ndele kai na eshi ya ninga po. 

Ova ti kave udite ombili eshi ounona vavo ve li komaumbo vehe na eshi tava ningi, noilongwa yavo otai kala i li konima. 

Kundana okwa ninga onghendabala yukukwatafana naBenny Eiseb ou e li omukulunhuwiliki wehongo mOmusati ashike ongodi yaye ita ku fwapo. 

fhamalwa@nepc.com.na