Victoria Kaapanda

Nonando aanafaalama yomomapya miitopolwa yimwe yomonooli okwa li ye li pokuteka omukumo sho omvula ya ningi ethimbo inaayi loka, mongashiingeyi otaya ligola ondigolo yomuule, sho ya likola iilya oyindji.

Ndinelago Iipinge gwomomukunda Omuthitu Gwalwani moshitopowa shaMusati okwa ti okwa teya shoka a kunu. 

“Oshipale shandje oshu udha iilya, nonando omvula okwa li ya loko kwa toka. MOshiwambo ohaku ti, uuwanawa ohau ya kwaamboka ya tegelela,” ta popi ngaaka.

Ta gwedha po ta ti, iilya mbyoka yi li moshipale she paife otayi tengenekwa tayi udha omashisha giilya ge li gatatu, nonando iilya inayi pwa mo natango okuteywa mo mepya.

“Oshiwike tashi ya, andi tameke okuhwitha iilya yandje, onda tega ashike yi pwe mo ayihe mepya,’’ ta ti ngaaka.

Soini Nathanael gwomomukunda Omulimbalimba moshitopolwa shaMusati okwa ti, ota pandula oshoka okwa longa iilya ye ya gwana.

“Oyendji otaya nyenyeta kutya inaya mona mo sha momapya gawo, omolwomvula ndjoka ya li ya loko kwa toka, niilya yimwe okwa li ya adhika ya sa po komutenya,” ta popi ngaaka.

Ta popi ta ti, nonando ombinga ye yimwe oyi na iilya kwa li ya si po nayo komutenya, natango okwa likola mo iilya ya gwana.

Nathanael okwa ti okwa li a tameke okulonga epya lye tango petameko lyaDesemba omumvo gwa yi sho omvula yotango kwa li ya loko .

Selma Andreas gwomukunda Onaushe okwa ti, kasha ivule a li inaa pululitha epya lye, oshoka okwa hepitha ashike iimaliwa ye.

“Ilya oya sa po thiluthilu komutenya. Onda ethela mo oongombe dhi lye shoka shi li mo oshoka kandi na shoka tandi kutha mo,” ta popi newi lyohenda.

Ta ti, okwa li a pululitha epya lye oowili mbali netata oshoka okwa li e na omukumo kutya ota ka likola iilya oyindji nuumvo.

Ta gwedha po kutya nuumvo ota mono iihuna oshoka ita vulu okulanditha iilya ye ngaashi shito oshoka ke shi shoka natango shi li komeho, pamwe nomumvo tagu ya kaku na omuloka omwaanawa.

- vkaapanda@nepc.com.na