Uuministeli wuundjolowele nonkalo nawa owalopota iipotha tayi tsikile okushuna pevi, ihe natango aantu taya tuntilwa oshowo taya konaakonwa oya shuna pevi.

Minista gwuundjolowele nonkalo nawa Kalumbi Shangula okwati, okukonaakonwa oko haku gandja omwalu guli mondjila kutya aantu yangapi ya kwatwa nenge kaayena omukithi ngoka.

 “Natango otwa lopotelwa kutya aantu ayehe ya si komukithi ngoka, inaya tuntilwa,” ta ti ngaaka. Ta ti, okuntilwa otaku dhana onkandangala onene oshowo otaku keelele omaso taga etithwa komukithi ngoka.

“Otandi tsikile okukumagitha noku tseyitha uuwanawa wokutuntila. Kehe ngoka a tuntilwa, a mana ko omalweetho agehe gaali gowenda, ota henuka eso,” ta kumagidha ngaaka.

Shangula ta ti, omiti dhoka ka dhina nando uuwinayi washa ngaashi omapopyo taga taambathanwa komalungula. 

“Ehogololo lyili mondjila okutuntilwa, okugamena omwenyo goye, aapambele yoye oshowo mboka hokala mekwatathano nayo,” ta popi ngaaka.

Ta ti, oshigwana ngele osha longele kumwe, eta shuuvuko shoka tashi kumagidhilwa nasho okuza kwaamboka yena ontseyo, okulwitha omukithi nguka, Namibia otaka sinda oCovid-19 muule wethimbo ehupi.

“Shoka sha simana okugwanithapo omalandulathano noompango ta dhizi koshikondo shuundjolowele, ngele kehe gumwe okwa tuntilwa, ompito yoku kwatwa komukithi gwoCovid-19 otayi shonopala,” ta ti ngaaka. Ta gwedha po ta ti, omuntu ohaya lulwa aatuntilwa uuna amanako omalweetho agehe gaali, ihe ngele okwa wendwa ashike oshikando shimwe, ita yalulwa  atuntilwa. 

“Ndika ethano lya yela kutya ngeno okwali aantu mboka ya hulitha ya tuntilwa, ngeno natango oyena omwenyo, oshoka omuti ngoka otagu shonopaleke ompito yoku kwatwa noku nkondopaleka aakwiita yolutu ya lwithe omukithi ngoka,” ta fatulula. 

Minista okwa kumagitha oshigwana shi gwanithepo omalandulathano agehe ka tulwa po, opo omukithi nguka gu vule okushonopala nogu hulepo.