NGOMA – Mubakweli likwambuyu wa silalanda, bupoti ni mishitu Mwiza Sibungo uelelize libakanyana zebabalela lifolofolo kusebeza katata nikubona kuli likutiseza sicaba, mwalikalulo zeshelashelana. Nabulezi zeo kanako yakuamuhela neulo yalico zene neulezwi bababukeleza lifolofolo kwasibakanya sapabalelo yalifolofolo sa Salambala. Sibungo naelelize katengo kakanca kene kaketilwe kweli yefelile kuzamaisa Salambala, kusebeza katata nikubona kuli limembala kaufela za Salambala bañoliswa.

“Lubone kuli limembala kaufela babapila mwa Salambala bañoliswa. Halulati kuutwa batu base babile limembala za Salambala kuzwelelwa haikwalulwa kono habasika ñoliswa. Mubone kuli limembala za ñoliswa kuli bafumane lituso kwasibakanyana sapabalelo yalifolofolo,” nekubulezi Sibungo. Nabulezi hape kuli katengo kabone kuli kabeleka katata nikukatanyeza lituso zezwa kwamuuso. 

“Musike mwatalimela feela kwamuuso, kono masheleñi kaufela amufumana mulekele bababaleli litobolo. Seli nako yakuli mukatanyeze muuso fahali. Kanako ye kambe Salambala itusize kufa minzi mulilo wamagesi ni mezi, mi bababaleli baswanela kuba ni lisebeliso sakata zebashimba mwamushitu,” nekubulezi Sibungo. Naitumezi hape kwatuso yalico zene neuzwi kikampani ya Rock Wildlife Foundation. 

Muyemeli wakampani ya Rock Wildlife Foundation Aaron Chimupanga naize kakulemuha musebezituna obasweli kueza bababaleli balifolofolo, “kampani neiketezi kufa lituso kubakonisa kuli bazwelepili ni musebezi wabona wabutokwa.” Hala lico zene neuzwi neli bupi, mafula akutatehisa, litapi za mwamakapa, mupunga, manawa ni masamba.