KATIMA MULILO – Likolo zefumaneha kwamatakanyani ili Konono ni Sibbinda nelifumani neulo ya miyaho yamakilasi kuzwelela kwaofesi yandumeleti wanaha Japan viki yefelile. 

Miyaho yemibeli haikopanywa neyahilwe kasinyehelo yamasheleñi alikana bolule bababeli kalikiti zemyanda yelobapeli (N$2.8 million). 

Hana bulela kanako yakutambeka muyaho wamakilasi aketalizoho kwasikolo sa Kanono, ndumeleti wanaha Japan mwanaha Namibia Hideaki Harada, naize mutayi ofilwe kutisa mapurojekiti mwaofesi yahae ubata kutisa cinceho ni zwelopili kwasicaba kapilipili.

“Lulumela kuli tuto sakata iswanela kutaha kwamakalelo abupilo bwaluna. Kacwalo kufa tuso yetalelezi mwatuto, kona nzila sakata yakutisa bukamuso sakata mwanaha Namibia,” nekubulezi Harada. 

Mwamanzwi ahae aku amuhela neulo yamakilasi, mubakweli kulikwambuyu watuto Faustina Caley naitumezi kwanaha Japan kwatuso yana ize netile kanako yeswanela, sina likolo hane lihapelezwa kufukuza kwanombolo yabaituti bakeñisa butuku bwa Covid-19. 

“Luitumela hahulu kwakezo yende mi kitulo yetuna mwalitaba zatuto ni kwaofesi yandumeleti wanaha Japan. Kabe makisi nasika yahiwa, nekuba tata kuli sikolo sa Kanono sibeleke hande mwatasa milao yetomilwe kanako yabutuku bwa Covid-19,” nekubulezi Caley. 

Naekelize hape kuli liluko la tuto lika babalela makilasi ni kuasebelisa kufa tuto sakata kwabaituti.