Likolo zene kwalilwe bakeñisa muunda mwa likiliti za Oshana ni Omusati likalile makilasi kasamulaho akukutela fafasi kwamezi. Kono likolo zeñata lisa kwalile mwasikiliti sa Ohangwena. Sibuabui wakatengo kasikiliti sa Omusati Simeon Kandjala naize mayemo amuunda mwasikiliti ambubo, mi likolo kaufela zeketalizoho zene kwalilwe mwaliviki zefelile likwaluzwi. “Kanako yacwale hakuna likolo zekwalilwe, mi mezi anze akutela fafasi,” nabulezi. Mwasikiliti sa Oshana likolo zelishumi kazepeli litaselizwe kimuunda.

Likolo liketalizoho hala zeo ili Oikango, Oshipumbu, Onakamwandi, Omushimboti ni Nevonga likalile makilasi. Kilikolo zepeli feela ili Peter Nanyemba ni Kupila zene kwalelezi. Viki yale baituti babalikana likiti zepeli nebasakeni bakeñisa muunda, nombolo yeo ikutezi fafasi kuhata kubabalikana 607. Lika libonahala kumbweshalafala mwalikiliti za Omusati ni Oshana, muunda uzwelapili kukasha mwasikiliti sa Ohangwena mi buñata batutisizwe. 

Katengo kasikiliti sa Ohangwena kabulela kuli likolo zemashumi amalalu kazesilezi litaselizwe hahulu, mi zelishumi kazelobapeli zateñi likwalelezi, zelobapeli likwalilwe swalelele, mi zepeli baituti batutezi fasikolo. Kukwaluzi feela sikolo silisiñwi ili Omutaku. 

“Milelo izwelapili kunyatisisa nikubona kuli mazazi asinyehile ayoliswa,” nekubulezwi mwapiho yamuunda. Kwanda bamianda yemibeli kabamashumi
asupile kababane bane batutisizwe viki yale, hakuna lipiho zenca zene amuhezwi viki yefelile. Mezi abonahala kukutela fafasi, kono sicaba basa elezwa kutokomela
habasila milapo. Nombolo yabatu bane batutisizwe mwasikiliti sa Ohangwena iyemi fa 366. Batu babalikana 1 900 ni minzi yemashumi asupile bataselizwe kimuunda mwasikiliti.