KATIMA MULILO – Mapokola banaha Angola baelelize mapokola banaha Namibia kuli kuzuma isi kamulao kukaswana kwaekezeha, bakeñisa kutokwa kutulo yende kulatelela kusanela kwapula mwasikiliti sa Zambezi. 

Mbowela wa Afilika kubonahala kusaba ni pula yende kanako yacwale. Yomuhulu wasipokola mwasikiliti sa Zambezi Andreas Shilelo nabilaezi kuli kutokwa pula kukaswana kwasunda batu kuli babate lico mwa nzila yeñwi.

“Butata (linanga) bufitile. Liviki zepeli kusina pula kutisize butata kwa lico zene cezwi mwasikiliti sa Zambezi. Nelu lemusizwe kimapokola mwanaha Angola kuli batu kale bakala kuzuma lifolofolo mwalibaka zesilelelizwe. 

Haiba pula inge isa neli lukaswana lwatalimana ni butata bwa kuzuma isi kamulao. Luna ni libaka zapabalelo ya lifolofolo zesilelelizwe, kacwalo nelu fumani kelezo yeo kuzwelela kwa mapokola mwanaha Angola,” nekubulezi Shilelo.

Nanitifalize hape kuli mapokola basa sweli kubata baana babane bane bafumanwi basweli kuzuma mwasibaka sa pabalelo ya lifolofolo sa Mudumo Lamubulo kakusasa. “Halunze luambola, kuna ni sikwata babanze babata motikala yene sebeliswa mwakuzuma busihu bwa mabaani. 

Kuna ni sikwata sesi inelezi kwasibaka sa pabalelo yalifolofolo. Neba utwile mulumo watobolo, mi ba alabela kaputako. Bafumana motikala yene yemi kwatuko yene sebeliswa mwakuzuma isi kamulao. Balelekisa motikala kuzwa busihu bwa mabaani kutaha kacenu (Lamubulo) kakusasa,” nekubulezi Shilelo.

Kezo yakuzuma isi kamulao ne ezahalezi kwa Singalamwe mabapa ni museto wa Namibia ni Zambia. Babakulubelwa neli babane mwa motikala, pili basika baleha kamautu, kusiya motikala yabona mabapa ni museto. “Neku fumanehile mautu abaana babane bane bali mwa motikala. Motikala nefumanehile ni mali mwa pokisi mokulongwa libyana. Mapokola hane babalelekisa, bafumana bababeli, bamata kuliba museto wanaha Namibia. Mapokola baswala alimuñwi, mi ukwalezi kwa siteshini sa Katima Mulilo,” muzamaisi wasikola nabulezi. Yakulubelwa kimuyahi wanaha Zambia mi nafumanwi ni tobolo ni malumo amabeli.