Aalandithi haya landitha kondje yomatala gaShakati Omaandaha  nEtitano, oya indile elelo lyondoolopa lyaShakati lyi ya gwedhele esiku limwe lyokulanditha.

Mayola gwondoolopa yaShakati Leonald Hango okwa ti ota tsu kumwe nondungethaneko yaalandithi okugwedhelwa ko omasiku gokulanditha kondje yomatala.

“Otandi pandula unene ngele taya landitha kehe esiku, oshoka kandi wete pe na uupyakadhi wokulanditha kehe esiku. Aantu mboka otaya kongo oomboloto dhawo oshoka ihaya longo, onkene naya pewe ompito yokukonga uuhupilo wawo,” ta popi ngaaka.

Ta gwedha po kutya elelo lyondoolopa otali tula miilonga omayindilo ngaka, lyi kundathane nkene omayindilo ngoka taga tulwa miilonga.

“Omasiku gaali inaga gwana shili. Unene mboka taya landitha iikulya, ngele inayi pwa po po esiku ndyoka iikulya yawo otayi ningi nayi. Ihe omasiku ngele oga landulathana otaya ka vula okulanditha nawa,” ta gwedha po ngaaka.

Maria Ashivudhi ngoka ha landitha iikutu momatala gokondje okwa ti, ongeshefa yomasiku gaali, tapu piti gatatu pokati itayi ende ngaashi ya hala nonando ookasitoma opo dhi li.

“Ota tu indile elelo lyondoolopa lyi tu sile ohenda natango lyi tu gwedhele esiku limwe pokati, nenge lyi ninge omasiku gatatu ga landulathana. Omasiku ngoka haga piti po pokati otage tu longitha nuudhigu,”ta indile ngaaka.

Ta ti, oye uvite ko kutya oya silwa ohenda, okungeshefela mpoka, ihe oya hala natango ya silwe ohenda.

Titus Shikongo naye ta landitha iikutu tayi ithanwa ”Ofardu” okwa ti, omasiku gaali inaga gwanwa, uuna kasitoma ina mona ethimbo lyokuya komatala Omaandaha nenge Etitano, opuwo oya kanitha kasitoma.

“Mokati koshiwike ohatu kala ashike twa kuutumba momagumbo oshoka kaku na ookasitoma komagumbo. Ohatu kala ashike twa tegelela Omandaaha nenge Etitano,” ta popi ngaaka.

Selma Silas okwa popile wo omasiku gatatu ga landulathana, oshoka uuna gumwe inaa landitha nawa Omaandaha, nena ota vulu okuninga omunelago momasiku ga landula.

Sheetekela Shimanya okwa lombwele omutoolinkundana nguka ta ti omasiku ngoka haya pewa inaga gwana okulanditha iinima yawo yi pwe po opo ya vule okukateka natango.

“Natango ohandi kala ndu uvite nayi opolisi ngele tayi kondeke ookasitoma dhetu tayi pula uumutse ngele tadhi ya meni. Olye ha ende nokamutse a uka koositola? Ookasitoma dhetu ohadhi shuna ihe ihadhi galuka we,” ta nyenyeta ngaaka.

Ndjinda Joseph ongoka ha landitha iikulya komeho gomatala okwa ti omashingithilo ngoka ohage ya yambidhidha lela nonando omasiku inaga gwana.

“Omasiku ngoka gaali omatala getu gokondje ohaga kala gu udha ookasitoma, nohatu mono oompito dhokulanditha nawa,’’ Joseph ta pandula ngaaka.

– vkaapanda@nepc.com.na