Marythar Kambinda

Undiwanyangela neba kamuhezi kwa Chinchimani Lasunda viki yefelile, kuyo tabela mukiti waLusata oeziwanga kiMulena waMafwe George Simasiku Mamili VII. 

Mukiti wasilimo nolilimanisizwe usali kuezahala silimo sa 2019, bakeñisa butuku bwa Covid-19, mi ueziwanga kutabela sizo ni kulemuha buiketo bwa sicaba sa Mafwe ni bayahi basikiliti kabutungi. 

Mubakweli kuMubusi wanaha Nangolo Mbumba nahatelezi butokwa bwalikezahalo zecwalo kakubulela kuli, lifa kolo yakuli banana ni babanca baitute sizo sabona ili kuli likezo zasizo litambekwe kwamasika akwapili. 

Nakupile babanca mwanaha Namibia kunga likezahalo zecwalo kuba zabutokwa, nikuituta kubabahulu hala litaba zabupilo.

Nabulezi hape kuli muuso wanaha Namibia ulemuha buitomboli bwa sicaba sa Mafwe bone buezizwe kanako yakulwanela tukuluho. 

“Kacwalo, nikupa likhuta kaufela zasizo mwasikiliti mo kuzwisezapata swalisano, kuyaha naha nikutisano yalipilu nako kaufela,” nekubulezi Mbumba. 

Mubakweli kuMubusi nabulezi hape kuli sizo kisisebeliso sakata sakutisa batu hamoho, kuyaha sicaba nikuzwisezapata buntu ni buikuhumuso bwa naha. 

Babañwi bane bali kwamukiti neli Ngambela waMasubia Albius Kamwi, mulena waOndonga Fillemon Shumbwa Nangolo, mulena Inyambo Yeta, ni mulena Sikute kuzwelela naha Zambia, hamoho cwalo ni mulena Johannes Chika kuzwelela naha Botswana, baeteleli basikiliti ni babañwi cwalo.