RUNDU- meatco mugendesi kurona pamberewa Mwilima Mushokabanji, katente asi kampani zaMeatco kuna hepa yimaliwa yokusika ko N$80 miliyun yiwize pangenderera yipo evango eli lyaRundu lyokatomeno likare talirugana. Eyi, mokukwama mwendi, kuna kara nye yimaliwa eyi yokutamekesa omu nakatameka katomeno muna hamene nonzambi, kufuta rutjeno, mema nayimwe ngoso eyi yapumbwa simaliwa mosinema somakwedi ntanzimwe. ‘’ eyi kuna kara nye yimwe yina kara nositangalimba eyi tuna hara nye kugusapo ngesi. Owu kuna kara nye udigu wounene.
Ose ngesi kuna kuyiliyonga yangesi. Mukupaturura evango eli lyokatomeno lina pumbwa simaliwa sokutamekesa. Yimo ana kufaturura ngoso Mushokabanji ogu kakakere sinkwa ntani modoropa zaRundu sivike kasipwire omu kakagwanekerer kumwe novahameni kevango eli womomukunda noKavango nadinye mbali. Mushokabanji katente asi age kageve mauzera kovanandima ndi vantu valihamesera melikwamo eli, muna hamene vanandima natni vakansela wonomukunda moKavango nadinye mbali omu kageve nombudi kwawo omu vana kuvahundira asi yinke ndi ngapi navaliwapayikira apa nye katomeno aka nakayapaturuka. Katomeno takapaturuka nye momakwedi ntazimwe kavanavakara asi kuna kuretamo silinga zomutero, eyi kuna kumoneka asi yimo nye tuna hepa kugendesa katomeno aka. Yii, nomurandesa yimuna yeni moomu momukunda, nayikwata siruwo asi tuyasike ntani siruwo nye mokukasika koGhana ntani nayikwata kwedi ndi asi mazuva 30 murandesi simuna oyagwane yimaliwa yoge, eyi nayikaninkisa asi oyafute nye eyi waruganesa.
Mushokabanji momapuragero kumwe nosayitunga zaNew Era, eyi kuna hamnene unene momarumbasano gongesefa, kugwanamo nsonso ntani evango lyahepa nye kulisikamena pwalyene lyokatomeno evango eli lina pumbwa yiruganeso yoyiwa ntani nyama vana kureta nazo zahepa kukara zina wapa. Yimwe yina kara, evango eli lyokatomeno lyahepa kuwapa nawa nawa likare lina kuzigida varandesi woyimuna yoyiwa.
Ose kwahere asi evango eli likare lyomutaro, lyokatomeno lyokomuzogo gosirongo. NCA makura yiyo nye twalituramo unene mokutjingisa evango lyetu eli, morwa pwanare evango eli kapi yatutompokere.
Yimo ngoso ana kutanta. ‘’ Ame ninahafa ose ngesi kuna kurandesa nyama ezi kosirongo saGhana, Angola ntani ngesi kuna kukamenesa maliyongo tukatulisepo marandesero koyirongo ya Middle East eyi yina kara asi awo kuna kukapura nyama zonzi unene yna kara asi marumbasano gomanene. Nsene asi natugwana nye oyo, ose kuna kuhuindira nye vanafarama asi mwahepa kurugana momunene moomu mwavhulira.’’ Yimo ana kutanta Mushokabanji. Mukurona gwaMeatco, simpe katente asi awo kuna hara asi vanafarama vahepa kuhafa, mongesefa omu nye navareta nongombe dina wapa unene kokatomeno yipo asi ngesefa ziwape.
‘’ Egano eli lyokupaturura katomeno kuna kara asi vanafarama vahepa kuhafa momunene varugane unangesefa ano nose yipo nye asi tuvahafeseko nsene asi anareta yimuna yendi ayarandese. Makura nye melikwamo lyangoso nalininkisa vana ndima vakare vana weke ntani vayarandese kwaMeatco. Eyi kuna kara mulyo unene nene. Yimo ana kutanta. ‘’ Dogoro papa, eyi kuna kara nye yokuvhura kukwama, omu tuna kukaruganesa nye ngesefa zangesi.
Yimo ana kutwikirako. Katomeno kaRundu, ngesi kuna kara nye 90% kapaturuke awo kwatameka mwaSindimba kuranda niongombe nye nyama ozo kuzirandesa tupu kositora saShoprite. ‘’ Ose ngesi kuna kutoma nongombe, makura tuna lipe nye nyamwetu makwedi gavali tumanese tupu oyo yina hupuko, makura kutunda op oose tatutameke nye kuruganesa katomeno ketu aka. Ose kuna hafa unene, nokutara asi mukaro gwanngesi guze komeho,’’ yimo ana kutanta mugendesi kurona.
-jmuyamba@nepc.com.na