Ondjamba nokandjambona kayo, ndhoka dha li dha patekene mondungu yomeya uule womasiku gatatu, osho dha patukununwa Etitano.

Omupopiliko nomugandji gomauyelele muuministeli womidhingoloko, iihwa nomatalelepo Romeo Muyunda okwa ti, oondjamba ndhoka okwa li dha pakatene mondungu moka okuza Etitatu, kohambo tayi ithanwa Omshila-gondjimba, moshitopolwa shaMusati.

“Oondjamba dhoka okwa li dha patukununwa kaanambelewa yuuministeli womindhingoloko, konima ya li ya lopotelwa oshinima shoka koshigwana,” ta ti ngaaka.

Ta ti, odha li dha patekene mondungu yomeya , sho kwa li tadhi nu omeya mehala lya gamenwa tali ithanwa Sheya Shuushona.

“Nonando aanambelewa ya li ya kondjitha okupatukununa oondjamba ndhoka, ondjamba ndjoka onene okwa li ya tsumo oondjila yadho, konima ya mangululwa , tayi thigipo okandjambona kayo,” ta hokolola ngaaka.

Ta gwedhapo ta ti, okwa li ya kondjitha okandjambona kalandule yina iikando ayihe itatu, ihe ondjamba okwa li ya tsikile oku ka thiga po.

“Shoka okwa li sha thiminike aanambelewa ya kuthe po okandjambona, opo ye ka kaleke mehala tali ithanwa Okutala Logde moshitopolwa shaMusati,” ta popi ngaaka.

Muyundaa ta ti okandjambona hoka oke li metonotelo lyuuministeli  womindhingoloko noye shi ningi opo ye ka kaleke nomwenyo, oshoka yina ke na nako.

“Otatu pandula oshoka oondjamba ndhoka nando dha kala mondungu yomeya omasiku agehe gatatu, inadhi monitha po omuntu oshiponga,” ta popi ngaaka.

Ta kumagidha ta ti, oshigwana nashi tsikile okugwanitha po oompango ndhoka dha tulwa po kuuministeli, oshowo okulopota mendeelelo iiningwanima yi li ngaaka.

“Itatu ka pitika oshigwana shi ikuthile oompango momake gasho, okudhipaga iinimwenyo, uuna ye ya popepi nayo, nashi lopote, aanambelewa otaya ka thika mbala,” ta popi ngaaka.