Mugara gonomvhura 23 momukunda Gcigco gatunga moRundu sikondovike sina puku kavamugwene epuko morwa nomfa dozina omu katonesere ozina sininke esi varugana nmomawo sokutoonesa yindongi nomukavasenge eyi kayitwarederere dogoro vakadogoroke.
Kandjimi Katjotjo Haingura pwanare kwamugwene asi kwato epuko kwendi, nye mpangura kazitere morwa age kayapulire asi sitambo sokuvatoona kapi sakere asi avadipage, age kwagazarere asi kuna kuvaronga tupu omu navakara. Mupanguli presidente Petrus Damaseb, ogu nye kayakere asi yige ana kutarera sipangura esi mouRundu, katente asi mugazarerwa gahepa kuyidiva asi age yige kareteserepo nomfa edi daBehatta Nipembe gonomvhura 57, eyi yahorokere mo 12 June 2020 opo nya gamuhomokerere amutoone. Mugazarerwa katambwire asi age kwatoonene ozina,nokutanta asi age kwavatoonene rutatu tupu kumwe nomburo zokutoonesa sindongi, makura ozina tavagwire pevhu. Konyima nye apa vakatukire, makura age tavavete hena rutatu komatama, nokuvasanga hena rutatu konompatji. Nipembe kwadogorokere morwa ehuli lyendi kwazonaukire. Ndokotora ogu gatawire muntu ogu kwagwene asi rutu rwanakufa kwazonaukire morwa mokumutoona nokumusanga, ogu gakere posihorokwa katente asi nakufa kwamutoonene nokumusanga rorunzi poyiha nye apa lyakarera ehuli.
Mugara ogu ana kutanta asi nomvhura dedi 23 nye kapi gadiva asi ezuvake vamureta, kapatanene asi age kapi gadivire asi kupi ana kutoona omu yina kara asi gayagumine nye poruha roridona makura ozina kapi hena vakere asi vaparuke kosihorokwa sangoso. Age katente asi eyi gayiruganene yangoso ozina yiwo vamusindire, morwa kwamuninkire asi age kuna kuronda yindongi yovantu, yina kutwaredera yindongi yovantu yizumbane. Haingura age kapatanene asi kapi katoonene ozina nomakukaturo. Ano ndokotora kwagwene asi kwamutoonene noyirwaneso yodigu. Damaseb katente asi age kuna kuyimona asi kwadwere yikapute ntani kwamusenge tupu rutatu kapisi ntazimwe moomu ana kuyitanta ogu gakere posihorokwa. Vapanguli makura kavatente asi morwa yito nye oyo ntani yitundwamo yandokotora, eyi yina kutunda kovahakuli vana kara asi kwadivikwa unene mouzuni, vana kutanta asi kapi yina kumoneka asi Nipembe ngano gaparukire morwa kumutoona oku Kunene. Kapi yina kutanta Yuma nampili asi mugazarerwa ogu kwadwere makaturo ndi asi yikapute ndi asi gasenge nakufa rutatu ndi ntazimwe, yimo ana kutanta Damaseb.
Mokukwama vapanguli, mugazarerwa kuna kutanta asi Nipembe kwamuhandukilire nye sili kuna kumoneka asi gahepa kumuhandukira morwa nare gagusa kurugana yininke yangesi. Mokugwedako nonkango dimwe hawe age kwagazarere asi kuna kumuronga, nye kapi gayidivire asi nayitwaredera dogoro nomfa. Epangero kalikarerepo Ruben Shileka, ano mugazarerwa kamukarerepo Petrus Hango.
rrouth@nepc.com.na new era