KATIMA MULILO – Muuna walilimo zemashumi amabeli kazeketalizoho, yatalimana ni mulatu wakubulaya ndatahe yamupepa. Nahanezwi kulibelela muzeko wahae kwande hane abonahalile mwakhuta yasikiliti sa Katima Mulilo Labune. Mubuso uakaleza kuli Munembo Sibonena nanatile ndatahe kwalikoshi ni munsi, Labubeli kwamunzi waWabona mwasilao sa Sibbinda mwasikiliti sa Zambezi, kalikakalezo zakuli neli muloi. Nyandi yana zibahalizwe kuba Sibonena Lukaezi, namatiselizwe kwasipatela sa mubuso sa Katima Mulilo ili kwana ilo timela Labulalu kakusasa. Mwaponahalo yahae lwapili mwakhuta fapila muatuli yomunyinyani Clara Mwilima, Sibonena yana bonahala kulyangana napalezwi kufa kalabo kana naka ikemela kapa naka bata muyemeli wamulao.
Na alabile feela kuli, “neni bulaile ndate.” Hane atolokezwi kuli nako yakuikalabela nesataha, kono pili nana nikulemusa khuta kuli nabata kuzwelapili cwañi, yena azwela feela pili kuipulela mulatu. Nekufumanwi mwakhuta kuli ukula butuku bwakanono nikuli kuna nilikakalezo zakuli wapulumuka. Taba neisizwe la 13 Liatamanyi kulumelela lipatisiso kuzwelapili, kuli piho yamayemo ahae iezwe, ili keto yakuli kana una nikuisiwa kwakutatububiwa iezwe. Cynthia Matiti nayemela mubuso.
Mwakezahalo yeshutana mapokola mwasikiliti sa Zambezi basweli kubatisisa kezo yabubulai, kasamulaho muuna walilimo zemashumi aketalizoho kazesilezi, kuzwelela kwamunzi waKabungo mwasilalo sa Chinchimani. Yane azibahalizwe kuba John Zambwe, natimezi mwasipatela sa Katima Mulilo Labulalu, kasamulaho akunatiwa kilimembala zeketalizoho zalubasi. Yabona zabubangoki mwasikiliti sa Zambezi Kenneth Simbwaye, naize nyandi nataselize kezalahae Miyaze Zambwe walilimo zemashumi amane kazeketalizoho, kakumutaba kwamazoho amabeli haketalizoho.
Miyaze namatiselizwe kwasipatelanyana kwana ilo alafiwa nikulukululwa. Nakile akwalulela muhulwanahae kezo yabubulai pili asika timela kale. Hakuna yatamilwe, mi taba nelumezwi kwaofesi yayomuhulu wabazekisi kuyo atula kana muzeko una nikuzwelapili. Kono Simbwaye ubulela kuli nyandi neli mutu yana lata mifilifili, mi nakena nikuzwa mwatolongo. “Nali mwatolongo kamulatu wabubulai mi nafumanwi mulatu kasilimo sa 2003, mi nalukuluzwi kasilimo sa 2014. Nekuna nitaba yeñwi yene sazekiwa yakutisa sinyehelo kwaliluo, ili yane apetile kasilimo sa 2022, mi kukulubelwa kuli nazubile matokwani hane alwanisa kezalahae,” nekubulezi Simbwaye.