Liseli libonahala kuatumela mwamukoti omutelele hala basupile babasiezi, baba nyazwa kabukwemuheli kasamulaho muatuli swalelele mwa Khuta Yepahami Petrus Unengu natomile lizazi la kutofa bupaki bwa mafelelezo Labulalu. Zeo litaha kasamulaho babakulubelwa Progress Munuma (62), Shine Samulandela (55), Manuel Makendano (69), Alex Sinjabata Mushakwa (58), Diamond Samunzala Salufu (61), Frederick Ntambila (57), ni John Tembwe (55), bafeza kubuzakwa lipuzo ki muzekisi wamubuso Lourens Campher.

Yomuñwi yana nyazwa ni bao Hoster Simasiku Ntombo walilimo ze 57, nalukuluzwi kasamulaho Khuta Yefeleleza nefumani kuli nailo tamiwa isi kamulao mwanaha Botswana kimapokola. Nebakile bafumanwa mulatu ni kulengiwa lilimo zemwahala 30 kuisa mwa 32 ki muatuli nyandi John Manyarara mwasilimo sa 2007. Kono lilimo zene batomezwi neli beezwi kwatuko ki Khuta Yefeleleza mwakweli ya Sikulu 2013, niku laela kuli muzeko ukale sinca pila muatuli yomunca.

Balobapeli babakulubelwa neba tamilwe mwahala Sikulu 2002 ni Ñulule 2003, mi seba inzi mwasitokisi lilimo ze 21. Banyaziwa kakuba nikabelo mwamulelo wakubata kutula mubuso wanaha Namibia mwasikiliti sene sizibahala sapili ka Caprivi mwahala Muimunene 1998 ni Ñulule 2003. Batalimana ni milatu yabukwenuheli, bubulai, kubata kubulaya, kubata kupuma, kutisa mifilifili mwahala sicaba ni kukenya litobolo mwanaha isi kamulao. Zeo kamukana lizwelela kwamuhupulo one upalile wakubata kupuma sikiliti sa Caprivi (Zambezi kachenu) kwanaha Namibia. Muatuli Unengu natomile lizazi lakufa bupaki bwa mafelelezi kuba la 9 Yenda, mi naikupezi maiswalelo kubaba nyazwa kwatiyeho, yene aize ne tisizwe kilika zecwale kapumulo mwakamaiso ni mundende wamizeko. Babanyazwa bahanyeza kuli neba bile ni kabelo mwakutaseza tolopo ya Katima Mulilo. Ilse Aggenbach ni George Neves bayemela babanyazwa.