Omuhongifikola Michael Mukupi oo a li a kwatwa po molwa oku ningila omukulunhufikola waye omatilifo, okwa pewa elifutilemo modolongo.
Mukupi oo a ninga omwedi aushe modolongo, okwa li a pewa eli futile mo noshimaliwa sho N$1500 komhangulilo yaMangestalata mOutapi kuyele oshivike shadja ko.
Omuhongi ou weedula 41 okwa li a kwatwa po omwedi wa dja ko shaashi va ti a tuka omukulunhufikola waye nokuningila omatilifo kutya ote mu dipaa.
Mukupi oha longo pofikola Tjihozu Combined School moshitukulwa shaMusati.
Va ti okudja omudo 2018 Mukupi nomukulunhufikola Lucia Shipiki ova kala vehe li udite, have li ponokele nomalaka. Va ti oha ti Shipiki omulodi ye ota li po oshimaliwa shofikola. Va ti ota lundile kutya mombelewa yaMukipi omu kwa li hamu tuvikilwa oshimaliwa shofikola okwa li mwa teywa ashike omukulunhufikola ka kwa li a hala Mukupi a ninge omakonakono.
Shipiki kombinga imwe naye va ti okwa kala ha ti Mukupi omwii. Va ti omukulunhu fikola ou okwa kufa nokuli Mukupi melelo-nongelo noku tula po omunhu umwe pohele yaye.
Oinima ei vati oya eta opo va kale vehe na ombili pofikola.
Eshi a dja mo makakuma Mukupi okwa lombwela Kundana ta ti okwa shuna koilonga Etitatu ashike natango kavena ombili nomukulunhufikola waye.
“Efiku lotete nda ya kofikola onde mu popifa. Okwa itave lange nombili, ashike efiku la landula ko onghalo oya shendja,” ta ti.
Okwa ti ota ka yandje ombili komukulunhufikola waye shaashi okwa hala va kale ve na ombili koilonga.
“Ombili oya fimana, osha fimana ngeenge ovanhu tave li diminafanepo onghee onda hala okukala nd ina ombili nokulunhufikola wange,” Mukupi ta ti.
Mukupi okwa weda po ta ti pofikola opo itadi po shaashi okwa landa onhele yedu opo paife a tunga po eumbo laye li li popepi nofikola.
Ashike Shipiki okwa lombwela Kundan kutya ye ita dulu okulonga mofikola imwe nomunhu e mu ningila omatilifo kutya ote mu dipaa. Ta ti ina lombwelwa ngeenge Mukupi ota alukile kofikola, okwa mona ashike nale omunhu e li mombelewa pofikola.
“Okwa li nda kumwa noda tila eshi nde mu mona. Onda handuka shaashi omhangu oya dopa okulombwela nge kutya Mukupi ote ya kofikola shaashi ka shi li mondjila okukala mofikola imwe nomutodi wange ou a ningila nge omatilifo,” ta ti.
Okwa hokolola ta ti efiku lotete Mukupi eshi a ya kofikola okwe mu popifa nombili ashike efiku landula ko Mukupi ina hala okupopya naye.
“Itandi diminepo omunhu ina hala okupopya naame. Inandi hala noku mu tala nokuli. Onda tila paife shaashi inandi manguluka vali ngeenge ndi li mofikola,” Shipiki ta ti.
Okwa weda po ta ti Etine Mukupi okwe mu lundila eshi a dengela omutalelishikandjolongo wavo ta lopota kutya Shikipi okwe mu pa opo a kale ta longele mongulufikola yoipeleki.
“Ohandi ka shangela omukunda keembelewa da kula dehongo koWindhoek kutya ka ndi na mbili vali. Ohai kaya yoo vali nomokafudo opo ndi ka fude po shaashi ka ndi na ombili yokomwenyo,” ta ti.