OPUWOS – Namibiab ǂHanub ǁgui-aimaris ǂNûiǂgās (NamRA) ge ǂhanusise Opuwos !nâ ǁîs !oabade ǀhûhâsiba sī-ūbas ase berosa ǂoa ge wekheb Donertaxtsēs ai ge ǁkhowa-am tsî nēs !nâ-ū Khorixas di berosa ǂkhâ!nâ tsî ǁanǂgāsabena ǂâuǀoasasib !nâ ra !oaba ǂgao. Nē beros di ǀhui-ams ǀkhas NamRAsa ra ǂâibasen !khais ge !aruǀîn Opuwos tsî ǂnamipeb di -ǁanǂgāsabena !nū kilometerga !nari tidesa, ǁîn di ǂhanub ǁgui-aimaris ǂhawega sī māǂgās tamas ka i o ǂhanub ǁgui-aimarisats ǁgui-aisase ra mātares di ǁgauǁgaus sertifikata hōbasens !aroma.
NamRAs Komisareb, Sam Shivuteb ge nē ǂhanusi ǁkhowa-ams ǁaxasib tawa ge mî, ǁîn ǂnûiǂgās sîsenni di !uru ǂâibasens ūǀgara tsî sîsenxa kais Namibiab ǂhanub ǁgui-aimaris tsî !hūb !nâ ǂgâxas tsî ǂoas ǁgaragu tsî daoǁgaugu hoaǁae ū!oasa ǀgui ǀgaub ais, ǂhanu-aise, ǂâuǀoasasib !nâ tsî ǂhanu ǀgaub !nâ nî dīhesa tsî ǁnās xōkhā ǂâisa mâ ǀguiǀguibe ǂhanub ǁgui-aimarisa ra mātare khoen tsî ǂharugu-aon ǂgaoǀkhādi ai nî ǂnûisa.
Komisareb noxopa gere ǀgonǀgon!gao !khais ge ǂhâsib hâsa ǂhanub ǁgui-aimarisa mātares diba tsîb gere mîs ge horahus ǀgaub sada !hūb di ǂhanub ǁîb ǁanǂgāsabena nî kō!gâ ǁkhās dib nē maride ǀhaoǀhaos !nâ-ū ǀgui a īǁkhāsa. “ǂHanub ǁgui-aimaride mātares ge a ǂgaoǀkhā tsî ǀhûǁarebese ra sîsenaihe dīǀgau hîa sada ǂhanuba ra mā-amma îb ǁîb ǁanǂgāsabena !oaba ǁkhā, aiǁgause daogu !âb, ǂurusib tsî ǁgau!nâs !nâ.
ǁNā-amagas ge sadu ra mātare marisa ra īǁkhā kai awa!namn ra ǁkhâkorobe ǁîn sîsenǂuib !aroma mātarede !khō!oa, ǂhanub sîsenaon ǁkhāti ra mātarehe tsîn soǀôana sada ǀaeǁgâugu tsî ǂurusib !oaba!khain tawa hâsa,” tib ge Shivuteba ge mî.
Komisareb ge ǂnûiǂgās di mā!hūs mâǂoahâ surudegu ǂnamipe hâ mātareǁnâs proxrammi disa ǀgonǀgon!gao tsî ge mî, hanats sa mâǂoahâ surudeba nē proxrammi di !gûǀams ai!â nî mātaretoas kara, o-i 100% ǁkharab di maris mâǂoahâ surudeb aisa nî xoaǁnâbahesa.
“ǁKhā ǁaeb ai ta ge ǁnā khoen hîa mâǂoahâ surudegu- ǀkha hâna ra ǂgan in ǂhâbasa ǀaweǁguiga NamRAs berodi tawa dī tsî ǁîn ǁkharab di maris mâǂoahâ surudeb aisa ǂNūǁnâiseb 2024 dis ai!â xoaǁnâbahe ǁkhā,” tib ge ge mî. Kuneneb ǀkharisi mûǂamaob, Marius Sheyab ge NamRAsa ǁîs !gâi!gâgu hîa ǀguixasib ân xa ra !aromahegu !aroma gangansa ge mā. NamRAs ge nē ǁaxasib tawa 200 xaraode ǀkharisi mûǂamaob berosa ge ǀkhae. - Nampa