Ongwediva-ministeragona gwanare gomapukururo magwanekero nounkurungu Engel Nawatiseb ngesi ana kadukako hena kombunga zaLPM konyima tupu apa kakalipakererere nawo konyara kwedi kumwe tupu. Age kayinkondopekere eyi kosayitunga zaNew Era nkera, nokufaturura asi age katokwere kutunda mombunga ezi kakalipakerere sinkwa ntani zompe konyima nye apa kagwanekerere novanekoro lyendi.
Nokutanta asi etokoro lyangesi kuna kara mauwa ga LPM unene ava vatotapo mbunga ezi ngwendi Swaartbooi. Mokugwedako, age gahepa kupopera untu wendi, nomukaro gwendi ntani muhoko ndi rudi rwendi.
Nawatiseb katente simpe asi age, nampili ngoso nakara muntu oku ana lipyakidire kuruganena muhoko gwaNamibia ntani vatungimo momukunda ogu gatunga nage. Age kwatundire mnombunga politika zaSWAPO aze koLPM kwedi kuna puko. Age kwamutambwire paveta mbunga zaLPM hambara sivike sina pitipo apa mbunga ozo zakere kuna kudana ezuva lyazo lyegwaneso modoropa zaTsumeb. Posilika nye oso Nawatiseb kakere ana hafa mokumona vantu vana kudimba oku tavadana. Posiruwo oso muna politika ogu kwakere nye nehuguvaro asi hawe nakara nye silyo sombunga zaLPM omu nakara nage asi kuna kureta malitjindjo moNamibia, omu katente asi marunduruko kuwiza nsene muntu okalipakerera kumwe nombunga zina kara asi kuna kuzipitisira mpitisili gomunona ntani ana kara nomagano. LPM age yizo mbunga kamwene asi kuna kusikisamo eyi vana hara vantu. Ano apa nye ngesi age Nawatiseb ana nyoka kutanta asi yinke nawa nawa yina muninkisa akatunde mombunga ezi kazire nkera tupu. ‘’ Ame kapi nina hara kulimbururako kweyi yina kuhoroka kwaLPM. Kapi nayimoenaka nawa kwawo, yimo ana kutanta. Nampili ngoso, age katente tupu asi koyili kamwene yina kuhoroka moLPM, eyi kapilire nye kuhara age, eyi kayimuninkisire aduke mombunga zina pangenderera.
‘’ Nompiti sili daLPM, vanayidiva eyi natundiremo. Awo vana yidiva nawa nawa asi ame kapi nahafa kweyi kayihoriokere,’’ yimo ana kutanta Nawatiseb. Mokumupura nye asi natengura hena kombunga politika zaSWAPO, age katente asi age kapi gapere mbapira zokutunda mwaSWAPO, yina kutanta asi age simpe muhameni. ‘’ Ame kapi yina karerenge udigu kutengura kwaSWAPO. Kuna kara nye mwawo mokutura etokoro, asi tavatjidange ndi tavapisurange. Ame simpe kuna kundindira kwawo vatokore ndi ngapi walye,’’ yimo ana kutanta.
Nokugwedako asi age simpe nosikarata sendi saSWAPO, ana kara ngesi.