Oshakati –Ndango zodoropa zaEenhana kuna kukaza vakagusepo nomukuli dovatungimo vazo mokugusako nsonso vagwedako morwa kupira kufuta koyirugana eyi azivape. Mukurona godoropa Omri-Onn Kavandje katente mbudi ezi kwaNampa momandaha, nokutanta asi vatungimo kuna kara nomakongo gokusika ko N$40. 2 nomiliyuna ngoso odo. 

Mokukwama nye mwayo, ndango kuna kara nye asi kavatokwere kugusako egwederero lyangoso, elikwamo lyangoso ndango makura yipo nye kazitokwere asi 100% zegwedreroko zahepa kutundako kovaranwa vawo vanangesefa ndi gopaumwene momakwedi 12. ‘’ Ose kapi tuna hara kuhameseramo nkenye ogu ndi asi kampani zokukapongayika makongo, makura ose yiyo nye tuna kupa vatungimo betu vafute kwayi twavapa moyirugana yokupitira mondango, yimo ana kutanta Kavandje. 

Elikwamo eli talikatameka mokwedi kwaMurongagona dogoro lika hage mokwedi kwaSindimba 2024. Mukurona godoropa kahundilire nye vatungimo asi vahepa kufuta mukuli gwawo momakwedi ogo 12, morwa oyo vagwedererako monomvhura dakapita tavayigusako. 

Kavandje katente asi projeka zangesi, kuna kuza nye komeho omu muna hamena kutumbura nonzira dawo dikare nomadina domodoropa, ntani awo tava kafuta nye mambo gamwe gopampo awo vadirukepo vagave ekuliko lyodoropa. Mfuto nye zokufuta ava vana kukadirura kuna kara yimaliwa nayinye nomiliyuna N$8, eyi vagwnaa kombatero zoministeli zawo. 

‘’ Nkenye ekuliko kuwiza nomarunduruko, moomu tupu tuna kuyimona asi zinzi sovantu kuna kudukira kodoropa zaEenhana. Eyi kuna kuretesapo nye asi vantu wokugenda mononzira ndi vana kurandesa mononzira kuna kuvhuka unene, yimo ana kutanta ngoso. Kavandje, katente asi nonzira kuna kara asi kuna zuramo vantu unene, vana kurandesa, yina kara asi kapi yina kugava efano lyewa nye hena kapi yina kuliza novetagendeso doropa. Mokugusapo nye udigu wangesi, ndango kuna lituramo unene mokuretamo navenye avakwatesako ndango vagwane yimaliwa vadikiseko evango eli nalikara asi lyomarandesero. Nampa